“Aruba no tin placa pa tene su cabes riba awa. E Aruba cu gabinete Mike Eman a laga atras na 2017, tabata un pais den estado di bancarota. e hecho cu Aruba ta un pais den Reino a scapa Aruba di un caida fatal. No solamente Reino Hulandes a exigi gobierno Mike Eman bandona su estilo di cowboy financiero, pero e cuadro di ley como pais den Reino a proteha Aruba. ”E tension creciente na Aruba ta e pio planificacion cu Aruba por a conoce. “Ta obvio pa tur hende cu e momento cu Aruba mester pa por drenta futuro, ta wordo domina pa wega politico cu ta sumamente peligroso pa e pais,” informantenan ta bisa DIARIO cu ta sigui busca tur informacion riba e situacion actual.
Cifranan ta indica cu Aruba tabata den estado di bancarota ora gobierno Mike Eman a entrega e pais den man di otro gobierno.
“Tur cifra y rapport ta mustra e estado financiero cu Aruba tabata aden. E opcion pa Aruba a sali for di desastre tabata e posibilidad hopi chikito cu Citgo lo por a wordo habri loke no a sosode manera tur advertencia na 2016 a indica,” informantenan ta splica.
Pa inversionistanan Aruba den man di gobierno Mike Eman tabata un pais di halto riesgo y poco stabilidad. “Rapportnan di Banco Central por ehempel tabata indica e factor di duda y falta di certidumbre riba tereno economico y financiero. Instancianan cu tabata dicidi riba stabilidad financiero di un pais riba plataforma internacional, tabata duna Aruba un chens pa stabilidad basa sigur riba e hecho cu Aruba ta parti di Reino Hulandes cu garantianan cu Aruba no por zink completamente,” a wordo treci dilanti.
DIARIO a haya prueba di e rapportnan aki.
Informantenan a mustra cu continuacion di e actual agitacion politico cu mester resulta den un eleccion manera ta wordo propaganda den pueblo, lo ta final di tur speransa pa Aruba y exigencia pa Reino interveni pa evita e caida total y fatal di Aruba.
“Con por hinca den pueblo cu awor mester bini eleccion cu lo exigi gastonan? Con ta bay bisa un pueblo cu necesidadnan social cu actualmente ta mas importante kende ta Ministro cu kico pueblo ta come,” a wordo mustra na DIARIO.
Un pais den problema serio no por drenta un eleccion cu por causa no solamente problema financiero pero confrontacion peligroso debi na e informacionnan falso cu ta wordo propaga pa asina kibra e realidad di e loke a pasa Aruba.
DIARIO ta keda pendiente di informacion di tur circulo. Hecho ta cu Arubianonan di tur partido politico ta den tension enorme debi na e situacion politico cu ta escala y ta sali completamente for di man na un punto crucial pa Aruba.
FUENTE: Con información de Diario de Aruba
