miércoles, 26 de febrero de 2020

(Aruba) Miles di kilo di cocaina confisca (+Venezuela)

Tur cos tabata basta trankil Dialuna riba lama rond di Aruba. Pero diripiente riba radar a aparece un barco di carga ta bin di zuid, y a drenta awa teritorial di Aruba.
E barco tin su AIS-System cendi, y aki RCC di Kustwacht por a identifike como “Aressa”, nabegando bao bandera di Cameroon.  E barco aki cu tin un largura di 95 meter, no a registra ningun rato riba e AIS-System cu e tabata di bishita na Venezuela. Su ultimo posicion duna ta Suriname, y cu for di eynan e mester viaha pa Grecia.

Pero for di e radar, por a nota cu e ta biniendo for di area di Punto Fijo (Venezuela). Ta comosifuera cu e barco aki intencionalmente a trata na ‘sconde’ su presencia den awanan teritorial.

SALI FOR DI VENEZUELA:

A sali na cla, cu e tabata mara na Waf di Guaranao (cerca di Punto Fijo) y a sali Diadomingo pa 5:00 pm di eynan, pa bay lama grandi y haci comosifuera cu “awor si” e ta rumbo pa Grecia.

E actitud sospechoso aki, y posiblemente acompaña pa informe di inteligencia, a pone cu Guardacosta di Caribe Hulandes a mobiliza pa e area unda e barco Aressa e momento ey ta moviendo cu su velocidad maximo.

Ora cu a topa cu e barco riba lama, mesora Guardacosta a duna e capitan ordo pa stop, y asina a bay abordo pa investiga un que otro cu e barco sospechoso aki, principalmente e pregunta di con nan a keda ‘scondi’ for di ora cu a sali di Suriname y no a broadcast nada cu nan a bin Venezuela.

Mientras tanto solo a baha y a bira scur, y keto bay oficialnan di Guardacosta a sigui haci un investigacion preliminar, y a bin descubri cosnan eyden cu no ta cuadra.

Finalmente e lidernan di Guardacosta a dicidi, cu ta bay cune rumbo pa Waf di Playa pa asina nan haci un mihor investigacion, incluyendo mas personal, equipo, y tambe K9 pa listra esaki.

TRECE PA WAF:

Den oranan di madruga, e barco a yega Waf di Oranjestad, y a duna ordo pa e bay mara na Dok-G cu ta keda net un tiki pazuid di Citgo Boulevard. Mesora hunto cu personal specializa, a bay haci un investigacion.

Aki ta unda cu a descubri cu e barco aki lo a yena tur espacio disponible cu droga. Tanto autoridad local, personal di Guardacosta, y Ministerio Publico a keda babuca pa topa cu asina hopi droga den dje. Con por ta cu ningun oficial na Punta Cardon y Punto Fijo no a ripara cu tabata yenando droga den e barco aki?

Mesora e Capitan y e tripulantenan a keda deteni, y a baha nan for di e barco. Nan a ser hiba pa Wardanan di Polis riba e isla, pa nan wordo cera y pa asina start cu e proceso di interogacion.

Ministerio Publico mientras tanto a pone beslag riba e barco aki.

MILES DI KILO DI DROGA:

Ora cu mainta a habri, por a nota cu keto bay tin masha hopi investigacion andando na e barco aki. Rond di dje tabatin diferente speedboat tipo Metal Shark di Guardacosta ta patruya, y riba tera tambe tabatin Polisnan arma ta controlando. Riba potret por mira con e portanan “Hatch Covers” di e barco full habri, pa asina luz por drenta y autoridad cu ta paden por controla mihor. Pues ta den e cargo area mes e droga tabata scondi.

Pa colmo pa 8’or di mainta e crusero Norwegian Epic a drenta y mara un tiki pabao di dje, y pa 9’or di mainta e crusero Explorer of the Seas a drenta y mara un tiki pariba di dje.

Turistanan tabata cana pasa bay banda di e barco di carga aki, sin cu nan sa di e cantidad enorme di droga haya abordo. Un golpi masha duro mes pa mundo di narcotrafico, y kizas pa esnan na Venezuela meti den esaki.

PURBA SCONDE:

E barco Aressa tabata den luna di Januari 2020 na Brasil. Despues di a bishita wafnan di Recife (Brasil) y tambe Fortaleza (Brasil), e barco a mara pa 24 ora largo na e waf di Paramaribo (Suriname) na comienzo di Februari.

Despues di Suriname, e barco no a raporta e lugarnan cu el a bishita. Hecho ta cu el a bay Venezuela si. Diripiente riba Diadomingo 23 Februari pa 12:04 am (madruga), el a aparece bek riba e AIS-System mustrando cu e ta mara na Punta Guaranao. Despues pa 4:57 pm (atardi) el a sali for di Punta Guaranao y ta indica cu e ta rumbo pa Grecia, y su plan tabata pa yega na Waf di Thessaloniki (Grecia) dia 30 di Maart venidero.

Pero unavez cu el a drenta den awanan teritorial di Aruba, su suerte a caba.

VARIOS TRUCK:

E droga cu a wordo haya abordo di e barco ta asina hopi, cu autoridadnan a dicidi cu tin di baha esaki rapidamente pa evita cualkier cos cu por socede cu e barco. Aki ta unda cu a pidi Marinierskazerne Savaneta pa duna un man.

Nan a presenta cu algun Truck cu asina por a descarga tur e droga for di e barco y pone nan den vehiculo. Cu escolta policial e droga aki a wordo hiba pa Marinierskazerne unda ta bay haci e pisamento di e total di droga, y tambe cuida esaki te ora cu ordo yega pa destrui e droga.

Te cu Diamars atardi, ni Ministerio Publico, ni Polis, ni Guardacosta di Caribe Hulandes no a emiti un boletin oficial relaciona cu e caso aki. Pero henter dia por tende fuentenan ta bisa cu ta trata aki sigur di un cargamento di miles y miles di kilo di droga, cu riba caya lo tin balor di miyones di Dollar.


 

LO + Leído...