E candidato Presidencial ta realisando un gira na e islanan di Caribe, caminda tin colonia di Dominicanonan, den cuadro di e eleccionnan presidencial cu lo tuma luga na mei, 2012.
Durante e bishita na Gobierno, topiconan di importancia a worde discuti manera e contacto entre e islanan den nos region y naturalmente cu Rep. Dominicana.
E politico mes a mustra gran interes, siendo Agronomo di profesion, pa energia di solo y biento cu Gobierno di Aruba ta concentrando hopi riba dje. Pa cual e tabatin intencion, si e logra ainda, pa realisa un bishita na WEB y tambe e Parke di Molinanan di biento na Vader Piet.
Minister di Infrastructura y Medio Ambiente y Minister di Finanza y Asuntonan di Utilidad y Energia (kende a actua como Vice Prome Minister) a splica e diferente aspectonan di maneho di Gobierno pa mehora producto Aruba, pa medio di proyectonan infrastructural, y renobacion y cambiando imagen di e barionan na Aruba den e proximo añanan.
Den cuadro di su interes pa energia alternativo, a splike tambe di e di Dos Green Conference cu lo tuma proximamente na Aruba, cual ta un iniciativa di Gabinete Mike Eman, y esaki a hala su atencion masha hopi mes.
Minister Sevinger a expresa su satisfaccion cu e colonia Dominicano residencia na Aruba ta forma un colonia basta uni y activo, pero tambe e bon relacion cu tin cu Consulado General di Rep. Dominicana.
E delegacion encabeza pa Hipolito Mejia a worde compaña pa sr. Agustin Vrolijk, director di e Departamento di Relacionnan Exterior. Na final di e bishita, e ministronan a gradici sr. Mejia pa e bishita y a haci entrega di un bunita buki cu potretnan di Aruba, como tambe di un pin di e bandera di Aruba. A desee hopi exito durante e eleccionnan presidencial.
FUENTE: http://www.diario.aw/2011/08/candidato-presidencial-a-mustra-hopi-interes-pa-maneho-di-energia-alternativo-di-aruba/
