(Aruba) Proyecto LNG (Liquid Natural Gas) di Valero ta canando

ORANJESTAD (AAN): E bishita di Presidente di Valero Sr. Bill Klesse na Aruba tabata uno masha grato, ya cu el a anuncia cu Valero lo inverti e aña cu ta bin entre 100 pa 200 miyon Florin den e refineria. Durante un conferencia di prensa sr. Klesse a enfatisa di ta masha contento cu e bon trabao di Ray Buckley, general manager di Valero na Aruba y su team.
Sr. Buckley a bisa cu e mainta ey nan a haya un bon evaluacion y cu e sosten continuo di sr. Klesse y su team di San Antonio ta di gran importancia. “Nos meta ta pa sigui maneha e operacionnan den Valero den un forma sigur y pa sigui cu e trabao di tur dia pa progreso di e operacionnan den e refineria.”.

Sr.Buckley, mescos cu sr. Klesse prome cu ne a bisa di ta gradicido na gobierno pa tur e apoyo cu nan ta hayando durante e ultimo aña y mey.
Riba e pregunta cua ta e proyectonan den cua lo inverti sr. Buckley a splica cu tin diferente obhetivo. Por ehemplo, un planta di desalinacion, tambe construccion di terminalnan pa prepara y drecha tankeronan, un container pa LNG (Liquid Natural Gas) y lo tin varios turn around riba cua lo enfoca pa e siguiente aña.
Pa loke ta LNG ainda no tin un suministrador definitivo. Sr.Klesse a bisa aki cu nan sa cu e proyecto LNG ta bon pa Aruba y su hendenan, pero e ta tambe hopi bon pa e refineria. “Esaki ta loke hopi bes ta worde yama un situacion win-win”.

FUENTE: http://www.diario.aw/2011/08/proyecto-lng-liquid-natural-gas-di-valero-ta-canando/