Prome Minister Eman a habri e conferencia gradiciendo sr. Klesse personalmente pa su esfuersonan haci pa a tene e refineria habri ya cu desde cu su Gabinete y Valero tabata den deliberacionnan continuo pa tene e refineria habri, no tabatin un occasion pa por a haci esaki.
Aruba ta aprecia su esfuerzonan enormemente ya cu trabao di hopi hende a keda sigura. E suma inverti di 100 miyon dollar ta un estimulo enorme pa economia di Aruba cu ta muestra di confianza den e actual Gobierno.
Tambe Prome Minister a duna elogio na Ray Buckley pa su trabaonan incansable den Valero. Despues di esaki sr. Klesse a dirigi su mes na prensa presente. E tabata masha breve den su declaracion.
Sr. Klesse ta contento di ta na Aruba na unda tin un team excelente trahando den refineria Valero guia pa Ray Buckley. “Nos a inverti mas di 100 miyon dollar desde e reapertura di e refineria. Si nos mira nos presupuesto di otro aña nos ta anticipa cu nos lo inverti entre 100 pa 200 miyon dollar e aña cu ta bin. Nos lo sigui cu proyectonan cu a worde para. E refineria tin un futuro”.
Despues di e bon noticia aki sr.Klesse a bisa cu e trabao di refina ta uno masha competitivo. Klesse a bisa cu tin un team dedica na Aruba y cu den interes di e comunidad aki tin bon un cooperacion cu pueblo di Aruba.
“Nos tin un tremendo relacion cu Gobierno di Aruba. Mi ta masha optimista. Nos a haya un bon presentacion awemainta y mi ta hopi satisfecho cu e dedicacion di nos hendenan aki”.
FUENTE: http://www.diario.aw/2011/08/%E2%80%9Cna-2012-lo-inverti-100-pa-200-miyon-dollar-den-refineria-na-aruba%E2%80%9D/
