(Aruba) Romar Trading a cumpra D. De Veer & Sons

Ambos compania ta prefera di no comenta riba e benta aki, pero nos fuente ta sigura nos cu pa algun miyon florin, Romar Trading di famia Harms a cumpra D. De Veer & Sons di Don de Veer over. E ultimo aki ta agencia di algun marca conoci na Aruba, manera Gatorade, Pepsi Cola, malta, cerbes Presidente, etc. Den e siguiente simannan lo anuncia e compra den forma oficial.
Esaki no ta e miho temponan pa haci negoshi y por nota cu esunnan cu mas forsa financiero ta sali pa yuda y tuma over esunnan cu no por wanta e sla di e recesion economico. Despues di hopi aña di bon temponan di negoshi, e compania D. De Veer & Sons a cay den mercado. Riba dje nos tin informacion cu por lo menos un di e partnernan principal den e compania a sali di e negoshi y bandona Aruba. Cu esey den mente, e propietario cu a keda atras a dicidi di bende. Cu si e benta final a keda cla no ta conoci na nos.

Romar Trading ta pertenece na famia Harms y e dos rumannan Milton y Juliska tin e maneho diario den nan mannan. Durante e ultimo añanan e compania a crece mas ainda di locual ya e tabata caba y asina comberti su mes den un gigante entre e agencianan di distribucion. Romar Trading a representa marcanan renombra manera Old Parr pa hopi aña. Pero poco poco a crece dor di a tuma otro marcanan manera Guinness Stout, Heineken y recientemente Johnnie Walker. Pa por completa su portofolio di bebida, e compania awor lo maneha Pepsi Cola tambe dor di e "deal" di D. De Veer & Sons.

Mester bisa cu Pepsi Cola pa hopi aña a competi fuertemente cu Coca Cola den e mercado di refresco na Aruba. Pero pa un of otro motibo no a haci suficiente pa mantene e marca, den forma di promocion y presencia den nos mercado competitivo. Cu cambio di agencia di Victoria Bottling pa D. De Veer & Sons, hopi a pensa cu lo a bin un cambio, pero esey tampoco a sosode. Al contrario, RC Cola di Victoria Bottling a sali duro y a marca su presencia den mercado, haciendo Pepsi Cola suficiente daño cu awor Romar Trading lo mester purba recupera.

Hecho ta cu e mercado di bebida y refresco ta conociendo cambionan drastico tras di otro durante e ultimo lunanan. Marcanan ta pasando di un agencia pa otro, enbusca di sinergianan nobo cu na final mester traduci su mes den un competencia mas activo, cu mas promocion y ofreciendo consumidornan e miho servicio y prijs posibel.

FUENTE: http://www.24ora.com/local-mainmenu-5/35580-romar-trading-a-cumpra-d-de-veer-a-sons.html