Surpasando na un manera substancial e meta di crecimento estableci pa 2011

ORANJESTAD(AAN)— Desde december aña pasa te cu juli 2011 por mira un consistencia den crecimento di turismo na Aruba, esaki ta segun cifranan di ATA cual ta wordo confirma tambe pa Banco Central. Minister di Turismo, Otmar Oduber a bisa cu Banco Central ta mira e crecimento aki hunto cu reapertura di Valero y e inversionnan cu Gobierno ta haciendo como algo positivo pa cu recuperacion di economia y su crecimento tambe,
manera cu Gabinete Mike Eman, Promer Minister y Minister Mike de Meza a pronostica. Papiando specificamente di turismo, Minister Oduber a comenta cu siman pasa e tabatin e oportunidad pa sinta cu diferente di e representante di oficinanan di turismo di Aruba den exterior.
Nan a reuni, papia y analiza aña 2012 cu ta nos dilanti, papia riba e promer lunanan di ATA Sui Generis. Aki e mandatario a expresa cu e ta hopi satisfecho con e organizacion aki, cu tur e profesionalnan den dje.
Nan a sa no solamente di desaroya nos turismo den un forma positivo, pero tambe den un tempo asina corto y cu un cambio asina grandi den structura di ATA, a logra laga e cosnan menos positivo atras y continua cu un ATA SG dunando e resultadonan manera a spera.
Pa loke ta luna di juli, Minister Oduber a bisa cu e luna aki, mescos cu luna di luni ta ser considera como ‘low season’ y den ambos luna a conoce crecimentonan grandi. Juni tabatin un crecimento turistico di 13.2% y luna di juli a trece cune un crecimento den bishitantenan di 7.9%.
E cifra aki ta yena e mandatario cu satisfaccion grandi pasobra ta mantene e meta cu a pone dilanti pa 2011 di un crecimento di 3%. Na e momentonan aki a surpasa e cifra aki na un manera substancial., surpasando 6% di crecimento den e promer 7 lunanan.
A pesar di e situacion na Merca cu su efectonan ainda y e incertidumbre cu ta reinando pa cu e medidanan cu ta bin, Aruba a conoce un crecimento di entre 5 pa 6% den e mercado aki den luna di juli. E resultado aki ta positivo si mira cu den e promer lunanan di aña no a cay den e mercado y den e promer 7 lunanan a mantene practicamente flat e crecimento di e mercado Mericano.
Mirando e crecimento cu Aruba a conoce den e promer 7 lunanan, Minister Otmar Oduber ta duna di conoce cu e maneho di diversifica, di inverti mas den Latinoamerica, particulamente Venezuela cu ta nos di dos mercado, y tambe den e mercado Europeo, ta dunando su frutanan.
Esaki no ta encera cu e mandatario no ta conciente cu tin lunanan cu ta bay ta dificil, cu tin retonan pa loke ta trata e mercado Mericano.
Specialmente awor cu e medidanan a wordo anuncia. Awor mester midi esaki y siman pasa durante e reunion cu e funcionarionan di ATA, a palabra cu Minister ta bay tuma e iniciativa pa den dos siman forma un plataforma nacional.
Den esaki lo inclui tur e partnernan pa sinta na mesa, organiza y studia e posibel efectonan di e medidanan di Merca pa cu nos isla. Intencion no ta pa keda mesun pasivo cu den pasado.
Ainda por corda na momento di e recesion na 2009 e gobierno di e tempo ey tabata practicamente inactivo, a laga e efectonan aki dal Aruba y esaki a wordo refleha den e cifranan di turismo di 2009-2010.
“Nos kier cana padilanti, nos kier prepara nos mes pa cualkier posibel efecto cu esaki por tin pa Aruba y pesey aki dos siman nos lo ta reuniendo den forma di un plataforma nacional pa prepara nos mes, pa si en caso lo por tin consecuencianan pa Aruba. Bo no ta mire ainda riba short term, Aruba ta hopi stabil y mercadeo y strategianan cu nos ta usando a pone cu na Merca nos no a cay, a mantene esaki flat, pero bo kier ta sigur cu si e efectonan aki mester bira mas grandi den mercado Mericano pa e consecuencianan pa Aruba nos por limita nan mas tanto cu ta posibel”, Minister Otmar Oduber a declara

FUENTE: http://www.diario.aw/2011/08/surpasando-na-un-manera-substancial-e-meta-di-crecimento-estableci-pa-2011/