Aruba a mira con cantidad di turistanan a sigui crece significantemente

ORANJESTAD(AAN)– Cu hopi satisfaccion Aruba Tourism Authority ta anuncia cu e cantidad di bishitante cu a bishita nos isla na juli 2011, a sobrepasa cifranan di e mesun luna aña 2010 y tur otro añanan anterior. Aruba a ricibi un total di 81,181 turista durante juli 2011, compara cu 72,245 na juli 2011 cual ta iguala un crecemento di 7.9%. E aumento por ser mira especialmente den e mercado Latino Americano y Europeo.
Latino America E Mercado principal cu a haci e impacto mas grandi na juli 2011, ta esun di Latino America. Lidera pa Venezuela, cu a crece for 6,284 bishitante pa 8,180 den cifra absoluto cual ta representa un aumento di 30.17% compara cu e mesun luna na 2010.
Sigui pa e mercado importante di Brazil cu tambe a conoce un crecemento di 30.13% cu ta representa un total di 2,773 bishitante pa e luna di juli. Argentina tambe a crece cu 17.28%. E cantidad di bishitante for di Colombia a baha cu 8.04% debi na e demanda halto di stulnan di e otro mercadonan den Latino America, cual a ocupa e asientonan via di Colombia lagando pues menos asiento pa Colombia.
Esfuersonan ta andando pa hisa e cantidad di asientonan for di Colombia pa asina acapara e demanda di Colombia y otro paisnan den Latino America. Norte America
Pa loke ta trata e mercado di Norte America, nos mercado principal, Aruba a conoce un crecemento di 4.6% cu ta representa un total di 8,307 bishitante mas compara cu e mesun luna na 2010.
Tur e diferente regionan di Norte America a crece especialmente e “western region” cu a bay dilanti cu 19.67% cual ta significa un desaroyo hopi positivo pa e mercado aki.
Europa
Europa a crece cu 3.6% na unda cu e tercer mercado mas grandi pa Aruba cual ta Hulanda a bay dilanti cu 2.7%. E crecemento aki ta representa un total di 4,262 bishitante. E pais cu ta haciendo un impacto enorme for di januari ta Italia, esaki debi na e charter cu ta bulando e ruta di Milan – Aruba desde December 2010.
Ademas di esaki , Alemania, Belgica y paisnan di Scandinavia tambe ta manifestando un crecemento hopi positivo. E cantidad di bishita for di Inglatera a baha probablemente debi na e situacion economico cu ainda no a recupera completamente y desempleo cu ta sigui ta halto.
Aruba a ricibi den e temporada di januari pa juli 2011 un total di 515,468 bishitante cu ta representa un crecemento di 6.27% di januari pa juli 2011, compara cu e mesun periodo aña pasa na unda un cantidad di 485,074 bishitante a bishita nos isla.
Pa loke ta trata turismo crucero, den luna di juli un total di 5142 persona a bishita, esaki ta 6.81% mas compara cu e mesun luna na 2010. E prome seis lunanan di aña 2011 tabata hopi positivo na unda cu Aruba a kibra record den cantidad di bishitante unda cu den luna di juni tawatin un crecemento di 13%.
E luna di juli tambe a demostra di ta un luna record pa Aruba y ya caba tin indicacion cu augustus lo mustra resultadonan positivo. ATA ta hopi orguyoso di e resultado nan aki, cu ta resultado nan di, entre otro, tur e esfuersonan cu ta worde haci localmente y den cada mercado.
Ta logrando di hisa e cantidad di bishitante nan den lunanan cu tin mester y tin espacio pa mas bishitante. Esaki no ta kita cu esfuerzonan ta dirigi continuamente riba hisa e calidad di e bishitante tambe, teniendo na cuenta cu e vision no ta dirigi riba sigui hisa cantidad eventualmente, pero hisa e calidad.
Esaki ta ensera cu no lo expande cantidad di cambernan na un manera masivo, pero cu esaki ta limita, como consecuencia cu asina cu yega e punto di ocupacion optimal di acomodacionnan aki na Aruba den tur luna, e isla no lo por crece na e mesun manera den cantidad mas. E crecemento na e momento ey lo mester ta den calidad pa asina por sigui ricibi mas ingreso pa medio di nos industria turistico pa e isla.
ATA ta spera di por ricibi resultadonan cu ta duna indicacion di e calidad di bishitante pronto, pa asina por midi e criteria aki cu ta un parti sumamente importante di nos strategia – calidad versus cantidad.

FUENTE: http://www.diario.aw/2011/08/aruba-a-mira-con-cantidad-di-turistanan-a-sigui-crece-significantemente/