E cantidad di barco tambe a aumenta, mustrando un crecemento di 14.6% di aumento den cantidad di barco of 220 barco na 2011 compara cu 192 na 2010. Esaki ta refleha un crecemento averahe di 5.1% pa luna of 28 barco pa luna na 2011 compara cu 26 barco pa luna na 2010.E crecemento mas notabel for di lunanan di Januari te cu Augustus tawata na lunanan di Maart y Mei caminda cu trafico crucero a mustra un crecemento di 42.4% y 38.2% durante di e lunanan corespondiente.
Ta importante pa destaca cu mientras e trafico crucero na nos puerto ta sigui aumenta, puertonan den nos region ta reflehando caida. Ehempel di esaki ta inclui: Bahamas (Freeport)-3%, Barbados (Bridgetown)-8.6%, Cayman Islands (Georgetown)-26.7%, Jamaica (Ocho Rios) -55,9%, Mexico (Cozumel)-19.9%, (Mazatlan)-84.2%, y (Puerto Vallarta)-45.3% por a nota cu hasta e ex capital crucero, e puerto di Miami, a registra un caida di 16.8%.
E motibonan principal di e caida den pasahero crucero na Mexico ta debi principalmente na e hecho cu varios linea crucero a stop di bishita Mazatlan y Puerto Vallarta pa e falta di siguridad na ambos localidad. Ocho Rios tambe a perde barco pa motibo di un producto turistico di menos calidad, cu ta un indicacion mas di con importante e producto cu bo ta ofrece e linea cruceronan ta. E capital crucero di Miami a perde su corona, esaki principalmente ta debi na e hecho cu Port Everglades, na Ft. Lauderdale, a bira e capital crucero mundial nobo cu mas crucero cu ta “homeport” na mundo.
FUENTE: http://www.24ora.com/local-mainmenu-5/37042-mientras-puertonan-den-caribe-y-merca-ta-registra-caida-den-barco-crucero-aruba-ports-authority-ta-sigui-registra-aumento.html
