(Aruba) Rescate pa speedboat Ryana a haya problema cu 5 tripulante

ORANJESTAD(AAN): A dura basta pero algo prome cu mey anochi dialuna e boto Ryana a drenta Aruba riba tow door di kustwacht. E boto Ryana ta un speedboat di 29 pia cu a sali for di Club Cardon na Venezuela pa bin Aruba. Na caminda drentando awanan teritorial di Aruba nan a haya nan mes den problema. Un motor a cay afor y na caminda e di dos motor tambe a cay afor.
Na dado momento e problema a cuminsa bira mas grandi ora cu e bateria a baha y e pompnan pa saca awa no tabata funciona mas. Alarma a worde bati y Aruba Ports a cuminsa haci e preparacion pa yuda e boto. E no tabata un situacion facil pa handle pasobra cu tempo ta pasa y Curaçao mester a duna ok via canalnan oficial pa e boto di kustwacht drenta awanan teritorial. E boto tabata riba e grens di Aruba cu Venezuela e momento ey.
Mester a traha rapido pa evita cu e boto ta drenta mas aden den awanan Venezolano haciendo e rescate mas dificil. Mas dificil pasobra no ta asina asina por drenta awanan Venezolano y mas dura e anochi ta sera lo bira un problema pa rescata e boto Ryana.
Mirando cu Curaçao su reaccion tabata tardando a dicidi di saca un boto di Aruba mes pa drenta awanan Venezolano pa yuda e speedboat local cu cinco tripulantenan. Esaki a bay hopi bon pasobra e boto Note Choose a logra yega na e boto Ryana trece den nos awanan pa despues pase over na kustwacht.
Asina e towing a sigui te cu anochi lat nan a drenta waf di Barcadera. E reaccion rapido di Aruba Ports a pone cu e problema a worde regla rapidamente.

FUENTE: http://www.diario.aw/2011/09/rescate-pa-speedboat-ryana-a-haya-problema-cu-5-tripulante/