Pero tambe a tene reunion na Bogota cu entre otro e Ministerio di Energia, encabesa pa Ministro Mauricio Cardenas. E mandatario den un entrevista a bisa di ta masha complaci cu e bishita di Prome Minister Eman, procedente di un pais bisiña y ruman di Colombia. El a expresa cu nan tambe kier estrecha e lasonan entre e dos paisnan aki, principalmente riba e tema energetico. Riba e tereno aki, e mandatario ta kere, e dos paisnan lo por complementa otro masha hopi mes.
Aruba tin un refineria grandi di taya mundial, mientras cu Colombia ta un pais productor. E datonan cu el a duna, ta indica cu e aña’ki Colombia lo yega na produccion di 1 miyon bari di petroleo pa dia.
Esey ta pone Colombia den Liga Grandi di productornan. Pues e conexion entre e dos paisnan aki ta hopi visible, segun e mandatario: Colombia por produci e petroleo y na Aruba e por worde procesa, “E ta un resultado hopi concreto di e bishita di e Prome Minister di Aruba,” e titular di Energia a duna di conoce.
Di otro banda, el a bisa, lo bay traha hunto pa Aruba logra desaroya fuentenan di energia alternativo di loke ta uzando awendia, p.e. fuentenan menos contaminante manera gas natural cu Colombia tin na abundancia.
“E reunion tabata uno fructifero y nos ta contento cu e bishita di Prome Minister pa estrecha e lasonan como nacion y buscando complementa otro,” e mandatario Colombia a expresa. Tambe a bini dilanti tur loke Aruba ta haciendo riba energia berde. “Nos ta masha interesa den e experencia di Aruba cu energia solar y di biento. Colombia tin un region, peninsula di La Guajira cu tin e mesun posicion geografico cu Aruba, esta awa, solo y biento.
Y nos kier probecha tur e conocemento di Aruba y Reino Hulandes, capitalisa esakinan y hiba nan pa Colombia,” Minister Cardenas a expresa. Na final el a manda un saludo pa su compatriotanan na Aruba, pa nan haci un trabao serio, pone nomber di Colombia na halto den tur e sectornan cu nan ta trahando.
FUENTE: http://www.diario.aw
