Haciendo esaki S&P’s ta duna muestra di e confiansa cu e tin den futuro di Aruba y tambe su aprecio pa e maneho di Gabinete Mike Eman. Aruba ta un di e poco paisnan na mundo di cua a mehora su evaluacion durante e ultimo aña. E aña aki caba Fitch Ratings tambe a afirma e evaluacion di Aruba.
Den e aña di crisis 2010 S&P’s a baha e evaluacion pa futuro di Aruba den uno negativo. Cu esaki e compania na e momento ey a indica cu den futuro esaki probablemente lo ta e caso. Ministro di Finanza de Meza e tempo a bisa claramente cu esaki ta debi na e mal maneho di e gobierno anterior, pasobra cu den e raportahe di S&P’s esaki a wordo bisa cu tanto palabra. Sinembargo, mientrastanto S&P’s ta convenci cu Aruba ta completamente bek riba e bon caminda. Testigo di esaki ta e cambio positivo di negativo pa stabil.
Literalmente S&P’s ta skirbi “We revised the outlook on Aruba to stable from negative to reflect recent reforms and improved growth prospects that diminish long-term risks to public finances”. Cu esaki S&P’s ta elogia e maneho di Gabinete Mike Eman: “The government of Prime Minister Mike Eman has taken difficult steps to tackle weaknesses in Aruba’s medical insurance scheme and its civil service pension plan, including raising premium payments and the retirement age, as well as introducing a new mandatory general pension plan”. E analistanan tabata impresiona di e disponibilidad y boluntad politico di e gobierno pa baha e deficit presupuestario den e periodo defini.
E interpretacion di e compania di evaluacion ta un declaracion independiente pa partido y inversionistanan indicando cu cosnan ta bayendo bon cu Aruba y cu e isla ta bastante capaz pa por cumpli cu su obligacionnan. Durante un investigacion di evaluacion cada aspecto di desaroyo economico di e pais y finanzas di gobierno ta wordo profundamente investiga y evalua. E mehoracion di evaluacion ta mas remarcabel ainda pasobra cu economia mundial den general y di Merca den particular – e mercado turistico mas importante pa Aruba – na e momentonan aki ta prestando malisimo. Un economia completamente habri manera di Aruba ta wordo directamente influencia pa tur loke ta pasa rond di dje. Na 2011 e evaluacion di entro otro Merca, Italia, Spaña, Portugal y Irlanda a wordo baha. Remarcabel ta cu e evaluacion mehora ta pone Aruba den e bon compania di Brazil. E pais aki a mira un mehoracion di su evaluacion dor di S&P’s di BBB- pa BBB. Asina mes un evaluacion menos cu di Aruba. Esaki ta nifica cu den bista di S&P’s e solvencia di Aruba relativamente mira ta miho cu di Brazil.
FUENTE: http://www.diario.aw
