Den e anuncio Edna Farro ta bisa cu e motibo di su decision ta personal. Edna Farro ta trahando pa mas di 20 aña den e sector aki, cuminsando for di ABN Bank cu despues a bira RBTT Bank.
E no a drenta den posicion di gerencia mesora, sino a start su carera como “Account Manager” di e sector corporativo y asina poco poco a subi yega te na e posicion di Presidente di RBTT Bank.
Algun tempo atras, e banco Canades RBC a cumpra e operacionnan di RBTT Bank. Cu e compra aki, RBTT ta bira un banco mucho mas solido, mientras cu RBC ta trece hopi experiencia y conocemento cune den e acuerdo aki. Claro cu den e proceso a bini hopi cambio tambe, pa cual algun tempo atras hasta tabatin protesta di parti di e trahadornan y nan sindicato.
Mescos cu na otro paisnan y den tur compania, e recesion economico ta pone cu tur organisacion ta cuminsa exigi mas produccion pa e mesun salario y den e proceso ta purba reduci gastonan innecesario pa mas cu ta posibel.
Edna Farro den su posicion di Presidente di RBTT Bank Aruba ta supervisa henter e operacion di e banco, den nomber di e doñonan. Algun tempo atras a nombra Pierre Rafini den e posicion di “Managing Director” di e banco.
Den e funcion ey Rafini ta e Vice Presidente di e banco tambe, na momento cu Farro no tey. Cu e decision aki, Pierre Rafini lo yena e funcion di Farro te ora cu e doñonan dicidi otro.
RBTT Bank mes no a sali afor cu e noticia aki ainda.
Di nos banda, nos ta desea Edna Farro tur clase di exito den futuro, den cualkier otro funcion cu e lo ocupa.
Na RBTT Bank el a demostra claramente cu e ta bon capacita y cu un sin fin di energia y conocemento pa maneha operacionnan grandi asina den cual tin hopi inversion envolvi.
FUENTE: http://www.diario.aw
