Comunidad ta opina tocante posible ciere di Valero, tin cu ta puntra si ta awor numa nan sa di e situacion!

ORANJESTAD (AAN) — Den e transcurso di dialuna algun reaccion a drenta na redaccion di DIARIO, tocante e posibilidad cu Valero por cera su portanan.
Diferente ciudadano ta haya cu e ehecutivonan di e refineria ta actua di mala fe, pasobra nan no ta kere cu na momento cu nan a firma e acuerdo cu gobierno y cu nan a mustra comosifuera cu nan a bin pa keda, nan no tabata sa caba e direccion cu e mundo petrolero tabata tumando.
Mayoria di e personanan cu a emiti nan opinion, no ta culpa gobierno, mas bien nan ta kere cu Valero no tabata suficiente honesto cu gabinete di Mike Eman, y no a mustra nan e realidad y a crea expectativa cu awor nan no por cumpli cune y atrobe un cantidad grandi di trahador local por ta na peligro di perde nan trabao.
No obstante, tin hende cu ta kere cu ta mehor pa gobierno papia mas abierto cu pueblo. Pa no tin miedo pasobra mayoria di nos pueblo sa y ta conciente cu ta trata aki di un problema externo, y cu nan a purba di rescata e refineria y al fin y al cabo nan a logra pero awor e situacion mundial a bira di tal magnitud, cu kizas tur refineria na mundo lo mester cera su portanan, anto wak cual por lanta for di cero y purba sobrevivi cu kizas, poco competencia.

Aruba ta un isla demasiado chikito, y den un caso aki dificilmente e por sobrevivi na un crisis mundial petrolero, y kizas PDVESA no ta e mehor opcion mirando cu Aruba su turismo ta depende mas tanto di Merca.

Locual a worde mustra na nos redaccion ta cu mester diversifica nos mes turismo, busca otro alternativanan tambe por ehemplo riba tereno di tecnologia di computacion cu Aruba ta hopi bon den dje, inverti mas den nos mes recursonan humano pa hisa nan nivel profesional, cu Aruba por bira un centro di formacion pa America Latina y Caribe den cierto areanan, unda cu nos por ta pionero.

En todo caso, no mester bira negativo ni pesimista. Tin un dicho ta bisa ora un porta ta cera diez bentana ta habri, y cu fabor di Dios Aruba lo por bolbe sali dilanti manera tempo cu Lago a cera, den circumstancianan hopi mas dificil cu loke nos conoce awendia.

FUENTE: http://www.diario.aw