Na principio tabata dificil pa kere cu despues di un settlement agreement y ni un aña despues Aruba ta para dilanti e mesun situacion. Ken por a biba y kere cu esaki lo bay pasa mirando cu di parti di Aruba a haci lo maximo y e gobierno actual ta haciendo lo maximo den su poder pa salba e refineria. Profil Economico a haci Bill Day preguntanan cu a surgi cu despues di anuncia un di 3 quartal cu ganashi cuadruplifica, y den apenas 3 luna despues e refineria na Aruba ta perde su balor economico.
REFINERIA FACTIBEL OF NO?
Segun vocero official di Valero, Bill Day, e situacion riba mercado mundial di petroleo ta uno sumamente dificil.
E capacidad di Valero na Aruba a wordo baha, pa mengua e efectonan economico. Capacidad di refinerianan tanto na Merca y Europa a wordo baha pa motibonan economico. Tin hasta cu ta sera y otronan na benta, cu ta e situacion actual.
E refineria na Aruba ta perde su balor economico of ventaha economico mirando cu e tipo di petroleo cu e ta procesa a bira scars y consequentemente e prijs ta aumenta. Economianan rond di mundo a cay, demanda pa crudo tambe y production di azeta, especialmente e petroleo pisa y sour cu e refineria na Aruba ta procesa tambe a cay.
Ora te tipo di petroleo ta scars su prijs relativamente cu e grado di benchmark di crudo ta aumenta y aki ta unda cu e refineria di Aruba ta perde su bentaha economico. – PE: Esaki cu otro palabra cla y raspa, no tin ningun balor economico mas den nos refineria.
Y e no ta keda solamente pa awor PDVSA entrega crudo sino e mester ta como prijs preferencial, mirando cu e prijs di mercado no ta rendabel pa e refineria sigui den operacion. Pa un prijs preferencial di PDVSA, tin e programa di PetroCaribe cu Aruba por haci uso di dje, sinembargo esaki tin un rabo su tras cu interes geo politico di administracion of gobierno di Chavez pa e tin poder. Ademas ela proclama islanan A,B,C como parti venezolano. Akinan tanto Hulanda y Merca no a aprecia Chavez su ponencianan of politica.
PAKIKO E GOBIERNO TA ENVOLVI?
Profil Economico a haci e pregunta dicon e gobierno di Aruba ta envolvi, mientras Valero ta e experto riba tereno di petroleo y pa 4 aña no a logra haya un partner strategico y awor e gobierno lo bay logra esaki? Bill Day a remarca cu Valero ta agradecido cu e gobierno di Aruba ta yudando.
Pa algun tempo Valero no a logra pa haya un partner strategico,(PE: apesar di a sinta na mesa di negosacion cu algun compania manera Pacific Rubiales Ecopetrol y tambe cu PDVSA. Awor e gobierno di Aruba tambe ta trata di negocia cu nan. E gobierno ta haci su maximo esfuerzo pa logra tene e refineria habri y speranza ta e ultimo cos cu ta perde).
KIKO TA PASA CU PROYECTO DI LNG?
Nos a puntra Bill Day den ki fase e proyecto di LNG ta mirando cu Valero tambe a compromete cu gobierno di Aruba den realisacion di e proyecto aki. Day a contesta cu por lo pronto e proyecto ta keda den planificacion.
Cualkier inversion den refineria aworaki mester tin un R.O.I. return on investment difini. Pa motibo di e situacion actual, y caida den demanda pa fuel pa motor na Merca y Europa ta haci cu e outlook pa refinacion ta den incertidumbre.
FUENTE: http://www.diario.aw
