(Aruba) Cumbre riba petroleo y gas a bay den un ambiente positivo

ORANJESTAD(AAN):E cumbre riba Gas y Petroleo cu a tuma lugar na Aruba entre representantenan di Valero, Ecopetrol, Repsol, GasUnie, Pacific Rubiales y Gobierno di Aruba, despues di un dia largo di intenso deliberacion y discusionnan tabatin como resultado un declaracion oficial. E declaracion a wordo firma dor di partidonan envolvi.

DECLARACION
Valero/Ecopetrol/Respsol/Gasunie/Pacific Rubiales/GoA
Participantenan na e Aruba Oil and Gas Summit
24 Februari 2012
Aruba

Gobierno di Aruba, Valero, Ecopetrol, Repsol, Gasunie y Pacific Rubiales a reuni awe na Aruba riba iniciativa di Gobierno di Aruba, cu apoyo di Gobierno di Colombia, pa identifica posibel scenarionan pa operacion y /o propiedad di e Refineria di Aruba y otro posibel proyectonan cu por mehora e exito di tal scenarionan. E representantenan di e entidadnan aki a discuti e siguiente topiconan:
1. Aliansa entre Gobierno di Aruba, Ecopetrol, Gasunie y Valero tocante un tuberia di gas natural entre Aruba y Colombia, proyectonan di LNG y CNG;
2. Aliansa entre Gobierno di Aruba, Repsol y Ecopetrol tocante exploracion di gas pafo di e costanan di Aruba; y
3. Aliansa entre Gobierno di Aruba, Valero y Ecopetrol tocante refineria di Aruba, incluyendo e prospectonan pa un “project upgrader” pa procesa crudo pisa di Sur America.
E participantenan a acorda cu e discusionnan tabata altamente productivo y nan a acorda pa studia den mayor detaye e posibilidadnan pa cooperacion y aliansa identifica durante e cumbre. E participantenan lo intercambia y programa discusion riba termino corto. Gobierno di Aruba lo asisti den programacion di e discusionnan aki.

FUENTE: http://www.diario.aw