ORANJESTAD (AAN): A pesar cu na Aruba tabata tin un silencio hermetico relaciona cu e identidad di e dos personanan cu a fayece antayera como resultado di e accion di polis contra di un banda criminal, tog e nombernan di e victimanan si tabata conoci den medionan colombiano.
E victimanan a ser identifica como Benjamin Castro Aguirre di 35 aña, conoci cu “Niño Can” y nativo di Dibulla, Riohacha. E otro homber ta Alcides Peralta Pereira, tambe di Dibulla di 54 aña.
E familiarnan na Colombia a confirma e morto di e dos personanan aki y a laga sa cu nan ta den tramitenan pa repatria e cadavernan te na Santa Marta, ciudad unda nan lo worde dera.
Segun informe cu DIARIO a compila, e victimanan ta miembronan di famianan hopi conoci na Riohacha y Dibulla.
Mas datonan ta indica cu Peralta tabata tin un yiu di 10 aña y e tabata casa cu un señora di fam Mendoza. In-oficialmente, a ser indica cu e tabata tin un yiu tambe na Aruba.
Castro Aguirre lo tabata biba den union liber cu un muher di fam Padilla.
FUENTE: http://www.diario.aw
