Prome Minister mr. Mike Eman hunto cu Minister Mike de Meza y Minister Michelle Hooyboer-Winklaar a reuni cu funcionarionan di Ecopetrol pero tambe cu Ministerio di Energia di Colombia.
Prome Minister Eman den entrevista live for di Colombia tabata masha contento di por a logra un apertura pa posible solucion pa e problema di refineria di Valero aki na Aruba. Specialmente despues di combersacion cu Juan Manuel Santos, kende di su banda a mustra comprension y a mira e seriedad di e situacion di e refineria aki na Aruba.
E Prome mandatario a bisa cu a logra un apertura di interes cerca Ecopetrol pa bini Aruba pa sinta hunto cu Gobierno y Valero y papia riba e posible scenario. Ta papia aki como accionista of doño completo di e refineria. Tanto den reunion cu Presidente Santos como cu otro autoridadnan di Colombia a duna un presentacion di Aruba, y di e posibilidadnan economico entre Aruba y Colombia.
“Presidente Santos a demostra un disponibilidad hopi grandi, igualmente Ecopetrol, pa sinta na mesa y busca un solucion,” Premier Eman a duna di conoce. E delegacion di Aruba tabata masha contento cu tur e cooperacion cu e ricibi for di Embahadanan Hulandes, tanto na Brasil como Washington y tambe Minister Rosenthal kende a logra concretisa e citanan necesario na Colombia asina riba man, mirando e urgencia.
E prome reunion tabata den un session grandi, durante almuerso, cu Minister Cardenas, Minister di Relacionnan Exterior y ehecutivonan di Ecopetrol, a sinti mesora e apertura cu tabata buscando pa yega na algo mas concreto. Primordialmente a papia di e cooperacion cu por tin riba e tereno di refineria, pero tambe e aspecto di gas a keda discuti.
Pa e reunion di dia 24 lo invita Petrobras, Ecopetrol, Valero y kisas PDVSA tambe, pa sigura continuidad di e refineria. E mandatario a enfatisa cu no a logra un solucion awor, pero e solo hecho cu Presidente Santos a pone su peso tras di e deseo pa yega na un soloucion, ta bisa hopi.
“Mi ta hopi contento. Y mi ta gradici tur e delegacionnan tanto politico como comercial cu a biaha anteriormente pa Colombia, pasobra nan intentonan a keda cristalisa cu e apoyo di Presidente pa yuda yega na un solucion pa e refineria,” Eman a duna di conoce.
FUENTE: http://www.diario.aw
