Minister Labao a acepta un invitacion di Prome Minister Mike Eman pa bira e key-note speaker den e Green Conference 2012. Durante e encuentro a elabora riba e situacion di Valero y a ricibi un reaccion hopi positivo di e titular di Energia y Mina. “Brazil a indica di tin interes renoba pa cu e refineria y ta dispuesto pa explora posibilidadnan atrobe pa cu Aruba”, Prome-Minister Mike Eman a informa for di Brasilia.
Hunto cu Minister encarga cu Energia, Mike de Meza y Presidente di ATIA, Ronald van Trigt, y consehero Sr. Richard Arends, a haci un bishita na Rio de Janeiro y Brasilia unda ta presentando e maneho di diversificacion di nos economia especialmente mirando e posicion strategico di Aruba den Reino Hulandes. Minister Labao a indica cu e conoce Aruba bon y cu lo duna tur su cooperacion mirando e importancia di esaki pa nos economia.
“Den caso di un reapertura di e negociacionan entre Brazil y Aruba, Gobierno lo ta activamente envolvi den esaki cu maximo prioridad “, minister de Meza a indica. Teniendo na cuenta entradanan di Gobierno for di e industria petrolero, cambio di divisa y tambe salarionan, Valero ta representa 15% di nos GDP.
E bishita na Brazil siguramente a duna su frutonan y esaki a worde confirma tambe door di Minister Labao. el a indica cu e reunion cu Prome Minister Mike Eman lo tin cu Petrobras durante e mision comercial den luna di maart lo ta di sumo importancia.
Sr. Ronald van Trigt, Presidente di ATIA, cu ta organizando un mision comercial pa Brazil den luna di maart tabata hopi satisfecho cu e encuentronan na e poder economico nobo. “Mirando e posicion strategico di Aruba como gateway entre Latino-America y Europa, ta esencial pa Aruba ta haci su mes presente na e pais suramericano aki mirando e boom economico cu Brazil ta aden aworaki”, presidente di ATIA a declara.
Prome Minister Mike Eman ta sumamente contento cu e reunion cu Minister Labao a crea interes di nobo di Brazil pa cu un cooperacion den e desaroyo di e refineria na Aruba. E ta hopi contento cu e demostracion di e interes aki, pasobra Brazil tin tanto e crudo como e experiencia y concemento riba tereno di exploracion, refinahe y desaroyo di energia sostenible.
E hecho cu Minister Labao a acepta di ta e key-note speaker den e siguiente Green Conference ta un indicacion hopi importante di e relacionan cu a worde crea durante e reunion na despacho di Minister Labao cu e delegacion di Aruba.
Prome Minister Mike Eman ta bisa cu awor esfuerzonan pa sigui traha riba e alternativa aki pa logra e continuidad di e refineria ta bay ta prioridad di Gobierno di Aruba, naturalmente cu atencion tambe pa e otro partnernan potencial den region.
FUENTE: http://www.diario.aw
