DIARIO tambe a haya informacion atravez e corant online Noticia 24 cu diabierna pasa, Gilberto Croes, representando Camara di Comercio di Aruba lo a reuni cu Mayor Alexis Donquiz, presidente di Puertos di Estado Falcon pa asina revisa acuerdonan cu tin e meta di establece e intercambio comercial y turistico entre Aruba y e peninsula di Paraguana.
Aruba ta situa solamente na un distancia maritimo di un ora di Paraguana, esaki desde Punto Fijo. Ta conoci cu den temporada halto hopi arubiano, vooral na December, ta bishita Punto Fijo atrai pa e oferta di productonan na un prijs abao. Y esaki ta sosode tambe cu e venezolanonan.
Segun informe, ya caba tin un carta di compromiso firma, y Gilberto Croes a laga sa na Punto Fijo cu esaki lo wordo presenta na e autoridadnan aki na Aruba, segun Noticia 24.
Despues di esaki lo presenta un propuesta di inversion basa principalmente den e adkisicion di un embarcacion apto pa e transporte di carga y personanan.
Donquiz a declara cu nan lo haci e coordinacion respectivo cu e instancianan consular atravez di e canciyeria.
Durante añanan 80 e ruta maritimo cu tabata existi entre Falcon y Aruba a desaparece y a ser reactiva na 2001, pero debi na fayonan tecnico a retira e unidadnan maritimo poco tempo despues.
E propuesta aki ta wordo analiza na Falcon y awor lo mester bay check kico e autoridadnan di Aruba ta pensa di e posibilidad aki di reactiva e ruta maritimo entre Aruba y Falcon.
FUENTE: http://www.diario.aw
