Prome Min ister Eman a bisa cu no ta prome bes cu ta haci un apelacion na Valero pa mantene e empleadonan den servicio, principalmente pasobra ta trata di mas o menos 600 persona cu tin un trabou hopi specializa y no ta facil pa nan haya trabou otro caminda.
Prome Minister a bisa cu ta importante pa Gobierno cu si tin un perspectiva pa e refineria habri bek, cu e grupo aki ta wordo manteni na trabou. Y esey ta un apelacion cu a haci na Valero na diferente ocasion.
“Mi tin cu bisa cu tanto biaha pasa cu nos a haya e refineria sera, y awor, Valero a reacciona na un forma sumamente humano, cu hopi comprension pa mantene e empleadonan den servicio. Awor nos a toca e tema ey atrobe. Nos tur dos ta pendiente pa PetroChina. Naturalmente nos sa cu esaki no por pa eternidad, pesey nos tur tin hopi interes pa den un forma rapido haya claridad di ki decision ta wordo tuma na Beijing.”
E Prome Mandatario a sigui bisa cu nan tin tur indicacion cu esaki, esta e decision di Beijing, lo ta positivo, pero tanten cu no firma ta keda den ansiedad y ta den en espera di un confirmacion di loke Gobierno ta sinti como algo positivo. Tanto e analisis internacional di e necesidad cu PetroChina lo tin pa un refineria manera Valero, y conociendo e cantidad di petroleo cu nan tin acceso na dje na Venezuela, ta duna “nos e confiansa cu e decision lo ta tuma positivo. Pero nos no por kita afo cu nos tambe tin cierto expectativanan cu cada bes nos kier mira realisa pasobra toch e tempo ta bay pasando.”
A combersa den forma hopi habri cu Valero di kico ta e escenarionan. Nan tambe a bisa di ta optimista cu PetroChina lo bini dilanti pa cumpra e refineria.
Minister Eman a repasa e dos etapa cu a trata den e proceso aki ta esun caminda a reuni cu esnan cu ta representa PetroChina na New Jersey, cual a finalisa caba, y awor ta den e di dos fase caminda e acuerdonan basico mester wordo aproba door di Beijing. Y esaki ta pendiente p’e. Probablemente e proceso aki ta un poco mas largo sinembargo no ta descarga un decision den e proximo simannan.
Gobierno tabain contacto cu Beijing na juli ora cu Valero kier a haya claridad di kico ta e posicion di e compania. Despues di a manda un carta y combersa cu e Embahador di China na Hulanda, a haya un carta caminda nan ta expresa cu ainda ta interesa pa cumpra e refineria cu empleadonan experiencia y a pidi Valero pa mantene e situacion actual status quo te ora cu nan tuma un decision. E refineria aki tin un balor strategico y importante pa PetroChina.
FUENTE: http://www.diario.aw
