AREVENCA envolvi den caso di fraude miyonario na Puerto Rico

ORANJESTAD (AAN): Ainda e trahadornan di Fly Aruba, aerolinea cu a ser lanta na Aruba door di e compania venezolano AREVENCA, ta wardando riba un areglo pa nan situacion despues cu Fly Aruba a ser declara bancarota y hopi di e empleadonan a keda sin trabao sin cu nan pago a keda regla.
Ta trata akinan di mas di 90 persona cu a perde nan trabao.

Awor DIARIO a haya informacion cu na Puerto Rico, e mesun compania aki cu a lanta Fly Aruba, awor ta envolvi den un caso di un supuesto fraude miyonario.

E informe ta mustra cu e compania Betterrecycling Corp. y Betteroads Asphalt Corp. ta demandando e compania AREVENCA, cu sede na Aruba, y su presidente Francisco Javier Gonzalez, pero tambe na e compania Madasi Oil Corp y su presidente Marcos Da Silva y su socio Miguel Lausell.

Nan ta reclama e devolucion di $7.8 miyon dollar cu nan a paga 100 mil bari di asfalt likido cu nan a cumpra y cu nunca nan a haya.

Miguel Lausell den un entrevista cu primerahora,com di San Juan a declara cu nunca el a defrauda ningun hende. El a laga sa cu Madasi Oil, ta representante di Arevenca na Puerto Rico. Na e momento ey, Arevenca, a bisa, tabata un compania hopi importante, fuerte, cu a haci negoshinan miyonario cu China, cu cuentanan substancial na Merca.

A agrega cu e doño di Arevenca, Francisco Javier Gonzalez, tabata un persona prominente, cu inclusive a reuni cu e Rey di Spaña. A laga sa cu e ta biba na Aruba y na Spaña.

Lausell a nenga cu nan lo por a comete algun tipo di fraude y a defende Arevenca como un compania di prestigio. Lausell, kende ta abogado, a rechaza di e haci un representacion falso.

Lausell y su socio Da Silva a indica na Primera Hora cu nan solamente a representa Arevenca pa haci e oferta di asfalt likido, pero cu e negociacion a ser haci directamente door di e empresarionan Diaz cu e compania bendedor.

“Nos no a interveni ni den e firma di e contract ni den e acuerdonan”, a declara.

E asunto aki, segun tin entendi a daña e amistad entre e famianan (esun di dje cu esun di esun interesa den e proyecto) y ta pesey cu el a pidi Arturo Diaz, e demandante, pa retira e demanda contra di dje. Banda di esaki, e lo pidi e famia Diaz pa conhuntamente haci tur gestion pa Arevenca duna nan bek e $7.8 miyon dollar cu a ser deposita den un cuenta bancario na Suiza como pago di e asfalt cu nunca a keda entrega.

E asunto aki awor ta wordo investiga na Puerto Rico y mientrastanto na Aruba ta sirbi como referente relaciona cu e caso di Fly Aruba.

Nos lo keda pendiente pa mas informacion relaciona cu e desaroyo aki na Puerto Rico como tambe na Aruba.

FUENTE: http://www.diario.aw