E gran mayoria a acepte y lo bay di acuerdo cune. E ta mas di locual ley ta prescribi.
Esunnan cu no firma, lo pidi Corte pa desolve e contract di trabao. Te ainda e trahadonan no por firma pasobra ta diabierna Valero lo anuncia ken ta e trahadonan cu lo sigui den servicio di e refineria.
Valero a bay di acuerdo pa paga e trahadonan a base di e famoso “kantonrechter formule”. Pues empleadonan di 18 pa 45 aña di edad lo cobra 1 luna di salario pa cada aña di servicio, plus 10% riba dje. Esunnan entre 45 aña pa 55 aña di edad lo cobra 1.5 luna pa cada aña di servicio, plus 10% riba dje. Y esunnan cu ta riba 55 aña di edad lo cobra 2 luna di salario pa cada aña di servicio, plus 10% riba dje.
Tur trahado lo ricibi e dos bonusnan pendiente, pues nan Christmas Bonus di un averahe di 2 mil Florin y nan Performance Bonus cu nan a haya na januari otro aña cu tambe ta un otro 2 mil Florin. Tur trahado lo ricibi un “signing bonus” tambe, di 3 mil Florin. Pues, tur trahado lo ricibi mas o menos 7 mil Florin riba e pakete social pa tuma nan retiro.
Abogado mr. Chris Lejuez ta consehero di sindicato IOWUA y a reuni cu e directiva di e sindicato hunto cu 180 miembro awe.
E gran mayoria a keda contento cu e pakete, pasobra el a resulta mas di locual nan a spera.
Mester menciona cu e pakete aki ta aplicabel solamente pa esunnan den CAO, pues no pa e hefenan of trahadonan cu un contract individual dl trabao.
Nan ta negociando nan mes cu e refineria, via un otro abogado.
“Mi no por bisa cuanto Valero lo paga pa e pakete social aki, pero si mi ta kere cu e lo core den miyones”, asina abogado mr. Chris Lejuez a duna di conoce na nos. Sin duda e pakete social aki lo bira un di esunnan di mas grandi di e ultimo añanan aki, den cual algun shen empleado ta haya nan mes forsa pa acepta un retiro inespera di e refineria.
Cu e pakete aki, Refineria Valero a pone un minimo di 4 luna di salario pa tur empleado. Pues, si un trahado tin apenas 1 aña di servicio, e lo mester haya 1 luna di salario. Den un caso asina, e lo haya toch un minimo di 4 luna. A pone un limite maximo tambe di 30 luna di salario, pues 2 aña y mey di salario.
FUENTE: http://www.diario.aw
