Instituto Nacional de Aeronautica Civil a sanciona DAE y a restringui algun salida di Aeropuerto di Valencia y di Maracaibo, debi cu nan no tabatin autorizacion debido, y e condicionnan pa duna servicio comercial.
Pasaheronan Venezolano a reclama, y nan Gobierno a dicidi haci algo!
En total a suspende ocho vuelo, y esaki ta afecta 560 pasahero cu no por a sali. Gobierno Venezolano a declara cu nan no ta haci wega cu seguridad y ora cu nan ta ripara cu tin avion cu no ta cumpli cu e rekesitonan necesario, principalmente for di punto di bista di maintenance, nan no ta autoriza ningun tipo di vuelo pa subi bay.
Esey ta loke presidente Francisco Paz Fleitas, di INAC a laga sa. E ta recomenda pasaheronan Venezolano cu di awor en adelante prome cu nan cumpra pasashi, pa nan certifica cu INAC cu e aerolineanan escogi ta conta cu debido autorizacion y permiso pa opera.
INAC a bisa tambe, cu nan a haya avalancha di reclamo di pasaheronan pa retrazonan di mas di 15 ora di vuelonan, y cu nan a cuminza mira masha mal condicion den gran parti di nan avionnan.
E acto aki ta socede net durante comienzo di Semana Santa, ora cu monton di Venezolano ta bula pa Curaçao y Aruba pa vakantie. Y pa colmo ya caba manera DIARIO a relata siman pasa, no tabatin cupo mas pa bin Aruba. Aki por mira potret di pasaheronan disgusta na Venezuela riba DAE.
| FUENTE: http://www.diario.aw |
