(Aruba) Un gabinete nacional den e crisis financiero y politico, segun Rudy Lampe

Despues di e KB devastador pa Gabinete Mike Eman no ta keda otro salida cu sr. Eman entrega su retiro na Gobernador. Sistematicamente a presenta cifranan ficticio, no a cumpli cu acuerdonan, e KB ta sigui enumera, ke men Gabinete Eman no ta bisa e berdad, no ta di confía y ta manipula, ke men Gabinete Eman no ta integro.

Una vez un sentencia asina cai y firma pa Rey Willem Alexander ta imposibel pa Gabinete Eman sigui goberna. Kiko awor?

E debe nacional di Aruba a jega na un nivel insostenibel y como Pais nos ta serca di bancarota. Ta AVP y MEP ta responsabel pa e debe nacional aki, ta nan dos a goberna for di 1986. Fraccion di AVP y fraccion di MEP mester sostene awor un Gabinete Nacional, cu lo consisti di expertonan independiente. Prome cu esei partidonan MEP y AVP mester firma un acuerdo cu pa sali di e crisis financiero y político aki lo bai over na un gabinete nacional. E gabinete aki su tarea lo ta di ejecuta e recomendacionnan di e estudio cu Gobernador a laga haci y di cua lo presenta un quick scan dialuna 21 di juli. Fraccion di AVP y di MEP lo apunta sr. Andin Bikker di fraccion di PDR, como presidente di Parlamento, pa evita cualke wega entre AVP y MEP den Parlamento y pa asina di un manera eficiente por aproba e leynan necesario cu ta bin di e Gabinete Nacional.

Den pasado mi partido (RED), cu a wordo castiga severamente pa e pueblo votador na diferente eleccion, a hancra den su estatutonan cu su minister lo mester ta un vakminister. Nos ta sigui boga pa un gabinete di expertonan, cu pueblo tin derecho pa tin su miho hende pa administra placa di pueblo den tur e ministerionan. Nos a desaroya full e perfil di un ministro profesional, cu exigencianan di su personalidad manera honestidad, y exigencianan profesional manera un estudio academico. E Gabinete Nacional lo meser goberna di un manera transparente y integro pa un periodo di 1 aña y lo prepara eleccion despues di a pasa e ley di financiamento y subsidio di partidonan político pa evita cu placa sushi atrobe ta drenta den gobernacion. Otro leynan necesario cu e Gabinete Nacional lo presenta ta cu ta hancra den nos constitucion e obligacion di un presupuesto balanza y di un sorto di supervision financiero externo pa evita cu den futuro nos ta bolbe cai den e abismo di un debe nacional insostenibel.

Na e momento di crisis aki mi ta spera cu Aruba haya su miho yuinan pa dirigi nos Pais cu lo mester tuma medidanan cu no ta popular y cu sosten unanime den Parlamento.

FUENTE: http://24ora.com