E persona cu e lo a viola ta su ex pareha, mama di su yiu.
E acusado no a presenta na corte, pero e caso a wordo trata.
Ta asina cu e muher a entrega un denuncia na polis cu riba e dianan en cuestion, e homber cu ta su ex a obligu’e di hasi sex cune.
E homber lo a rank’e na su cabey, a dal e, a tene duro na su braza y a hasi sex cune.
Segun e muher, te hasta e homber a viol’e na su parti atras y cu e homber a obligu’e di guli su sperma.
E homber di otro banda a admiti cu el a dal e muher ora cu nan tabata pleita, pero cu e sex cu a tuma lugar tabata consentual, esta e muher tambe tabata kier.
Pa demostra esaki abogado Darren Crouch, kende hunto cu J.J Steward ta abogadonan di e acusado, a trece un laptop pa huez wak un grabacion.
Ta asina cu riba un di e dianan riba cual J.A lo a viola su ex pareha, J.A a graba e momentonan cu nan tabata hasi sex cu otro.
Segun Crouch y Steward, e video ta mustra cu e muher no a wordo obliga pa hasi sex y bo no ta wak J.A ta chok’e, of ranca su cabey, manera e muher a bisa.
E laptop a wordo poni dilanti di huez, unda cu e abogadonan hunto cu e fiscal griffier y e huez a sinta wak e grabacion di 30 seconde.
Fiscal asina mes a bisa cu e no ta haya cu e video ta demostra cu J.A no a viola e muher.
El a exigi un castigo incondicional contra dje di 42 luna, kitando e tempo cu J.A a sinta caba den detencion preventivo.
Despues cu e abogadonan a presenta e defensa y a enfatiza cu nan cliente ta insisti cu e no a viola su ex pareha, huez a bisa cu e ta bay duna su veredicto dia 18 di December.
| FUENTE: http://www.diario.aw |
