Cu e realidad aki riba mesa, por conclui cu tensionnan ta halto atrobe entre e dos Gobiernonan, cu un menasa serio di Hulanda cu lo por emiti un otro “KB” contra Gobierno di Aruba.
Den e reunion a bini padilanti un actitud completamente diferente di Gobierno di Hulanda, cu awor ta para riba cu CFT mester bin Aruba y cu mester tuma mas medida di locual Gobierno di Aruba a propone te cu awor.
E discusion formal ta sinta riba e hecho cu Corsou y Sint Maarten a acepta CFT despues cu a paga tur (of mayoria) di nan debenan. Esey no ta e caso awor pa Aruba, locual pa Gobierno ta inacceptabel.
E cantidad di ahustacionnan proponi tambe ta keda un discusion entre e dos Gobiernonan. Aruba ta papiando di introduci un Health Tax di 1% riba BBO entrante otro luna y un Transfer Tax ora haci transferencia via banco. Sinembargo, Gobierno di Hulanda, cu conseho di CFT, ta keda insisti cu e miho forma pa aumenta entradanan di Gobierno awor ta door di aumenta BBO.
En bes di his’e cu 1% so via Health Tax, pa tira 2 of 2.5% mas riba dje.
Durante su bishita relampago na Aruba, Richard van Zwol, di departamento di Binnenlandse Zaken di Hulanda, a reuni cu Minister Angel Bermudez, cu e representante di CFT y cu Presidente di Raad van Advies, esta ex Gobernador Frits Goedgedrag. E tabata compaña tur caminda pa ehecutivonan di VNO.
Na su salida e no a bisa ki decision lo tuma awor, pero e ta considera cu nos ta para na “start lijn” atrobe. Bisando esaki, no por descarta cu Gobierno di Hulanda lo tuma decisionnan pa forsa Gobierno di Aruba pa sigui consehonan di CFT, subraya pa Conseho di Minister di Reino.
| FUENTE: http://www.diario.aw |
