Di 2009 pa awor gobernacion di Mike Eman I y II a restaura diferente di nos monumentonan y asina ta salvaguardia no solamente nos edificionan historico, pero tambe e historia tras di e monumentonan.
Un historia cu lo bay perdi sigur pa nos hobennan si restauracion y renobacion no tuma lugar. E balor di monumentonan ta grandi, hopi di nan ta “Landmark”nan di pais Aruba y nos mester haci tur esfuerso pa conserva nan. E interes pa e restauracion di Faro California ta grandi pa diferente motibo: 1. E monumento lo ta den bon condicion atrobe; 2. Piscadornan lo haya un indicacion di nan posicion riba lama; 3. E historia di e faro lo haya bida; 4. Turistanan por drenta e monumento y haya un recorido den dje y posibelmente subi te ariba. Por cuminsa pensa riba un suma chikito pa entrada cu lo bay pa mantencion di e monumento den futuro. A menciona tambe cu e placa y e plan tey pa e restauracion y cu pa fin di aña e trabaonan mester ta kla. Presente na e ceremonia tabata e parlamentarionan: Clarisca Velasquez, Jeffrey Kelly, Melvin Tromp y Lorna Jansen-Varlack. Fraccion di AVP den parlamento semper a sostene e maneho pa cu e restauracion di e monumentonan di pais Aruba y ta aplaudi inversionnan cu tin balor historico y cultural pa pueblo di Aruba. Mirando e diferente monumentonan cu a worde restaura rond di Aruba un sentimento patriotico ta drenta nos curason y ta pone hende refleha riba e vision grandi cu Kabinete Mike Eman II tin pa pais Aruba.
| FUENTE: http://www.diario.aw |
