E ‘Beach Policy’ te ainda ta encera e Westkust di nos isla cuminsando di Bushiri te cu Basiruti. Porfin despues di tanto aña e lo bira un realidad y mirando e crecimento di Turismo cu nos isla a conose el a bira algo necesario.
Pa yega na un structuracion no ta facil pa motibo di costumber pero asina mes tin algun punto di salida cu ta keda cardinal den e structuracion; 1. Nos beachnan mester por keda acesibel pa publico. 2. E watersportnan existente lo mester por worde structura den palabracion, deliberacion y cooperacion huntu cu nan mes y ningun momento nan lo mester worde perhudica. E watersportnan tey pa un motibo, obviamente tin un demanda pa nan, sinembargo nan mester keda garantisa servicio di calidad y cu den e proceso di operacion ta tene cuenta cu e bida maritimo y seguridad di e usuarionan di e beachnan. 3. Structuracion di usonan di palapanan pa un y tur basa riba ‘first come, first serve basis’.
E implementacion di e maneho nobo ta sumamente importante pa motibo cu no tabata conose un maneho concreto pa nos beachnan y e caso tabata cu hopi di nos turistanan ta ser manda pa otro pida lama siendo cu e beachnan mester keda publico y acesibel pa tur hende, mescos ta pasa cu nos localnan. Hopi biaha nos localnan no sa mucho bon cual beach nan usa y ta prefera di bay pariba di brug of otro lama.
Nos beachnan ta un tesoro cu nos isla tin, esey ta e nr1 ‘selling point’ di Aruba, nos Turismo ta promove nos beachnan blanco y precioso. Nos no lo por sigui sin structuracion y mantene beachnan cu no tin locual nos ta propaganda. E implementacion no lo ta facil, pero no imposibel. Aruba lo kier yega den futuro na remarca pa e ‘Blue flag certificate’ pa nos beachnan pa mantene e calidad di nos herencianan natural mas largo posibel. E maneho nobo aki di Beach Policy lo tuma su tempo y ta premira cu pa Augustus of September 2015 lo por mira resultadonan notabel di e maneho aki.
| FUENTE: http://www.diario.aw |
