(Aruba) Arubianonan ta sinti insigur na Punto Fijo

Hopi arubiano y hendenan residencia na Aruba ta bishita Punto Fijo ya sea pa turismo of salud. Recientemente, teniendo cuenta cu e situacion na Venezuela hopi a dicidi pa no bay Venezuela mas.
Esaki ta e informacion cu a drenta na nos mesa di redaccion. E motibo di esaki ta e inseguridad y pa e hecho cu e arubianonan ta wordo horta.

Tur hende sa cu Venezuela no ta e Venezuela di antes. E situacion ta hopi dificil y caotico pa e venezolanonan. Esnan cu ta bishita e pais aki ta sinti’e na diferente manera.

Nan ta ripara e inseguridad cu tin. Aparentemente tin arubianonan cu a wordo horta na nan hotel. Tambe a surgi e situacion unda cu pa drenta Venezuela, na Imigracion, lo mester drenta cu $300 y ora di cambia e suma aki na e tipo di cambio di gobierno, e arubianonan ta sali perdi cu hopi menos placa cu si nan lo a cambia esaki den e mercado negro.

E informe aki a drenta na nos mesa di redaccion di parti di diferente lector cu e intension di adverti e hendenan local pa evita bay Punto Fijo. Mientras cu e situacion sigui manera cu ta, ta masha insigur pa bay tuma risico.

Mas den siman lo sigui amplia riba e situacion aki.

FUENTE: http://www.diario.aw