Dialuna merdia por a mira un grupo di Venezolano para na skina di edificio Ventura, esun dilanti Plaza Daniel Leo y banda di Caya Grandi, cu tabata planificando con e edificio nobo ta bay bin.
Nan a papia di un edificio di dos piso, unda den e prome piso lo bin un tienda di paña fini.
E informacion aki nos redaccion a haye di un bon fuente, cu tin parti den un negoshi den Playa mes y cu tabata testigo di esaki.
E fuente di informacion a comenta cu si ta negoshinan na bienestar di Aruba ta bon bini; si ta hendenan cu ta bay tuma Arubiano den servicio, paga nan bon, duna nan un bon trato, ta bon bini.
E ta spera cu prome cu nan habri negoshi, Departamento di Labor y su minister, alerta e grupo aki cu Aruba tin su leynan laboral, pa e no sosode manera tabata e caso cu un negoshi di doño Venezolano ubica den area di hotel, cu tabata abusa hopi di su trahadornan y hasta na dado momento nan a purba di retira un mucha muher di trabao, pasobra el a sali na estado.
Ta danki na intervencion di Departamento di Labor, nan e persona ey no a logra e meta. Y no ta esaki so. Riba tereno di construccion tambe tin kehonan cu nos mes corant a yega di haya di trahadornan cu a keda di mal trato y falta di pago di contratista Venezolano.
Tambe tin indicacion cu e inversionistanan aki ta hayando tur cos masha facil mes, pa lanta negoshi na Aruba, mientras cu pa e yiu di tera mes tin cantidad di rekisitonan cu ta wordo exigi di nan, djis pa habri un negoshi chikito. Esaki ta locual negociantenan local (di e poco cu a resta) ta laga sa.
FUENTE: http://www.diario.aw |