E emision di aviso aki a bin debi cu pasashi pa y di Venezuela ta sumamente scars, mientras e caminda entre Caracas y e aeropuerto na Maiquetia Simon Bolivar ta sumamente peligroso.
“Ora di yega Venezuela ta preferibel cu bo wordo busca pa un taxi of shuttle di e hotel cu bo ta keda of door di personanan di confianza. Ignora personanan cu ta insisti pa hiba bo pa Caracas.
E personanan aki ta guia e turistanan pa autonan di nan complicenan y hera ta menasa y atraca bo”, e aviso ta bisa. Ademas tin mas tip riba e website di e ministerio hulandes di Asuntonan di Exterior.
E aviso emiti ta basa riba informacion di e embahada hulandes na Caracas, servicio di inteligencia, representacionnan di diferente paisnan, autoridadnan local, negoshi y otro organizacionnan.
Banda di esaki a ministerio a referi na disturbionan estudiantil y di oposicion, debi na instabilidad politico y scarsedad di cumida.
Ademas no ta consehabel pa biaha cerca di frontera cu Colombia.
E ta hopi peligroso pa motibo di tensionnan na frontera, mientras tin presencia di guerilla colombiano fuertemente arma.
Ademas e area aki ta conoci pa traficacion di droga cu crimennan serio manera secuestro.
E siguiente ciudadnan ta peligroso pa risico di ladronicia, atraco, secuestro of matamento, Caracas, Valencia, Maracaibo y Isla Margarita.
Yatenan cu ta ancra dilanti e costa venezolano ta core risico di ladronicia y otro crimennan.
| FUENTE: http://www.diario.aw |
