Ayera tardi merdia e miembronan fraccion di VVD den Tweede Kamer, esta Han ten Broeke y Frank Kappen, a haci mencion di esaki mustrando nan preocupacion pa e ultimo desaroyonan cu tin caminda nan ta papia di peliger di un ola di exiliadonan for di Venezuela den proximo lunanan.
Ya caba ta mirando un tendencia den e direccion aki ora cu tanto na Aruba, Corsou como Bonaire, tin cantidad di ciudadano Venezolano ta yegando, buscando pa ayudo pa nan situacion na e pais bisiña.
Aki na Aruba pa ultimo cinco luna, a mira un aumento significante di bishitantenan for di Venezuela, kendenan no solamente a bin cumpra productonan cu nan no ta haya na nan pais mas dor di e crisis serio cu e pais ta pasando aden, pero varios ta buscando un miho porvenir tambe sea aki na Aruba of na cualkier di e otro islanan menciona.
E fraccion di VVD ta mira e ultimo desaroyonan aki cu hopi preocupacion ya cu nan ta kere cu den proximo lunanan, e situacion lo empeora mucho mas y cu lo bay tin un exodo masal for di Venezuela, buscando un forma pa yega na un miho bida.
Ten Broeke y van Kappen a mustra ayera cu Hulanda no por keda sin mira den direccion di Venezuela ya cu e lo bira algo mucho mas serio y peligroso.
E dos miembronan di VVD a mustra cu nan ta considera Venezuela na e momentonan aki un “timebomb” cu ya ta cuminsa tik y un ora pa otro lo por rementa den cara di Hulanda y mester realisa cu ora cu esaki sosode, e islanan di Aruba, Bonaire y Corsou lo por wordo uza como un trampolin pa yega Hulanda.
Den e debate di awe den Tweede Kamer nan lo trata di saca mas informacion for di Minister Koenders pa mira kico lo bay ta maneho di Gobierno cu e situacion aki, ya cu defensa di islanan Caribense ta totalmente den man di Hulanda.
| FUENTE: Con información de http://www.diario.aw |
