Den un declaracion duna e siman aki, Minister encarga cu Asuntonan di Stranheria, Benny Sevinger, a splica cu e caso di tramitadornan estafador ta den man di husticia caba. Y si tin mas hende cu ta estafa cu permiso, mester denuncia esakinan na Polis.Segun e mandatario a splica DIARIO, tin diferente persona cu ta yama nan mes tramitador. Tin companianan cu ta haci e trabao di tramitador serio y tin otronan simplemente ta wak oportunidad di por estafa ciudadanonan cu ta kere cu e personanan ey ta haciendo cosnan legal.
Tin diferente caso andando na husticia. Ta trata di hendenan cu a falsifica firmanan di Minister y otro instancianan pa cual Husticia ta bezig cu nan. Tin diferente tramitador cu ta cobra hendenan sin duna e servicio. “Mi ta bisa e ciudadanonan ey bay haci un denuncia, esta contra esnan cu ta cobra ciudadanonan cu ta kere cu nan permiso ta worde procesa y na final ta ripara cu no a worde ni entrega na DIMAS, corda pa e worde procesa.”
E mandatario a expresa na diferente ocasion cu na momento cu e ley di LTU drenta of pasa, Gobierno lo duna un curso pa certifica cierto companianan cu a pasa e curso y publica nan pa tur hende sa cual ta e companianan cu ta cumpli cu ley, cu ta paga nan impuesto, cu nan businessplan ta registra, ta registra na Camara di Comercio, pues nan ta compania legitimo y ta traha serio. Sinembargo, niun hende por obliga un ciudadano servicio di cual compania e ta haci uzo di dje pa tramita su papelnan.
Si e dicidi di bay cerca un persona pasobra supuestamente e persona aki tin su contactonan, e ta un riesgo cu ta core y e persona mes ta hinca su curpa den problema. “Nos ta bisa cu en realidad no mester di ningun tramitador pa haci bo diligencia na DIMAS. Pero si bo kier hacie, averigua prome si ta un compania of persona serio.
Si ta hendenan cu ta bisabo cu nan tin contacto cu Parlamentario of conexion cu Minister, no kere den e personanan aki pasobra nan ta estafabo. Ningun hende no ta worde yuda pasobra nan conoce Minister si of no. Mester cumpli cu bo rekisitonan y entrega nan na DIMAS. E hendenan cu ta bisabo cu nan tin conexion, haci denuncia riba nan pasobra esey ta contra ley,” Sevinge a expresa.
FUENTE: http://www.diario.aw
