Minister Paul Croes tabata tin un reunion cu diferente persona cu tin salon di beyeza y nan ta poco preocupa. E mandatario a reuni cu representantenan di e sector di beyeza, kapsalon, estilista. Tambe nan ta representa e grupo di Spa, un cantidad grandi di compania cu ta registra te na e momentonan aki, mas of menos 1400 compania, den e sector aki. Aki ta papiando di un sector hopi grandi y tin cu bisa cu un biaha mas ta duna atencion ora cu tin preocupacionnan grandi.Sin duda e preocupacionnan cu a worde treci padilanti ta preocupacionnan valido, como cu ta un compania local, como cu ta un compania cu ta cumpli cu impuesto, cu ta cumpli cu trahadonan nan pago di nan prima, ta cumpli tambe cu vergunning di Economische Zaken pa por opera un camara di Comercio, tin diferente rekisito ora ta estableci na Aruba.
Nan ta sinti cu tin varios compania den un forma inhusto ta operando sea na un forma ilegal of sea sin permiso valido of sea cu personanan cu ta indocumenta den e sector aki specificamente. Ta papia di negoshinan cu ta sosode na cas di hende, sin cu tin un establecimento di negoshi.
Ta papia di personanan cu ta bin di afo pa por haci e trabaonan aki, sea di pelukeria, sea di cosmetica y ta haci un competencia cu ta inhusto , pasobra ta paga nan menos placa. No cumpliendo e ora tambe cu nos leynan laboral pa loke ta trata pago di salario minimo, cumplimento cu vakantiedagen, cumplimento cu contracto laboral cu mester tin cu un persona asina. E preocupacionnan a worde teni na cuenta.
E pasonan cu e comision aki a tuma ta hopi positivo, mirando cu nan asinta hunto prome, a trece nan preocupacion dilanti, a reuni cu Camara di Comercio, a pone nan preocupacion riba papel, a acerca e otro coleganan, mirando cu ta trata solamente di e aspecto laboral, pero tin varios aspecto tambe cu ta trata e aspecto hudicial. Tin aspectonan tambe cu ta trata e aspecto migratorio, esta permisonan ta worde duna, pero tambe otro areanan, manera e parti di ROP. E cantidad di salonnan di beyesa cu por tin pa cantidad di poblacion. Aparentemente esaki ta birando hopi, pero ta un aanpak integral cu tin cu worde tuma. A yega na un acuerdo cu lo presenta e proposicionnan di nan na conseho di ministronan, como cu ta diferente minister a trata e topico aki y lo pidi tambe conseho di parti di departamento di labor, con pa tackle e situacion aki.
Primeramente e minister por bisa cu ta haya lamentable cu ciudadanonan di Aruba mes ta participa na e tipo di situacion aki, causando cu companianan cu si ta den cumplimento cu nos leynan, si ta cumpli cu impuesto, si ta cumpli cu SVb, ta worde poni den desbentaha pa motibo cu nan mes ta bay cerca e personanan ilegal, personanan cu no tin nan papelnan na ordo. Ta haci un yamada na comunidad pa esaki.
Tin companianan cu pa hopi aña ta estableci na Aruba haciendo trabaonan, embeyeciendo nos ciudadanonan y den e caso aki tin cu bisa pa duna nan e apoyo primeramente. No bay pa motibo di cheaplabour y pa motibo di mas barata, bay den negoshi cu companianan cu ta haciendo e actonan ilicito, ilegal, pa motibo cu ta preparando un plan pa tuma accion contra tur e companianan aki, segun Minister Croes.
FUENTE: http://www.diario.aw
