(Aruba) E debate riba e areglo di conflicto pa Reino a yega un punto crucial

Informacion nobo ta indica cu awe Diahuebs, ta discuti riba e areglo di conflicto den Reino, cu parlamentarionan di Aruba, Curaçao y St. Maarten. “Ta for di 2010 nos ta discuti y traha pa yaga na un areglo di conflicto pa Reino Hulandes. E areglo aki mester percura pa ora tin un disputa of desacoerdo entre dos of mas pais di Reino, cu esaki no ta bira un pleito manera a sosode den pasado, pero cu mescos cu un corte ta laga hueznan dicidi ken tin rason.
Na 2010 colega Juan David y ami a entrega un mocion den reunion di parlamento Hulandes. Den e mocion aki a bisa cu mester bin un areglo y a describi kico e meta di e areglo meste ta. Tambe a adopta un amienda di fraccion di MEP pa haci un areglo algo cu mester crea.”

Seis aña despues y hopi estudio, trabao y esfuerso, tin dos areglo den forma di concepto di ley riba mesa. Uno di Minister Plasterk di Hulanda y uno di e parlamentonan di Aruba, Curaçao y Sint Maarten. E pregunta ta kico ta bay sosode awor.

Aki Rene Herdé a bisa: “Awor e discucion y e trabao pa yega na un areglo di conflicto a yega un punto crusial. No ta cuestion mas si ta bini un areglo. E pregunta ta con e areglo lo ta, con lihe ta bin cun’e y si e ta cuadra cu e criterionan cu e parlamentonan a aproba aña pasa. Aña pasa a bisa cu e areglo di conflicto mester worde ehecuta door di un corte independiente, e mester duna veredictonan final y e mester atende cu diferencianan di opinion legal riba e Statuto di Reino. E concepto di ley cu e parlamentonan di Aruba, Curaçao y Sint Maarten a presenta ta cumpli completamente cu e criterionan cu a aproba aña pasa.

E proposicion di minister Plasterk no ta cumpli cu e exigencianan ey. E discucion ta awor anto, kico bo ta haci cu e concepto di ley cu no ta cumpli cu e exigencianan cu hunto nos a aproba. Mayan nos ta bay wak kico e delegacion di parlamento di Hulanda ta bay bisa. E tres parlamentonan di Aruba, Curaçao y Sint Maarten ta para uni pa crea un areglo di conflicto manera nan a presenta, pasobra esey si ta cuadra cu e exigencianan cu a fiha. Awor no tin caminda back pa pospone of nenga un areglo di conflicto. Ta dilanti so nos por bay y crea un areglo cu ta preveni of soluciona conflicto den forma desicivo y imparcial. Nos ta optimista pa mayan y pa e areglo cu ta bay crea.” Asina Rene Herde a declara for di Den Haag, Hulanda.

FUENTE: http://www.diario.aw