“Na momento cu Mike Eman a cuminsa cu e welga di hamber, el a crea un cortina di huma completo pa Aruba cu no tabata consciente di e problema sumamente serio cu el a hinca Aruba aden. Awe mundo politico di Reino ta confirma cu Aruba ta practicamente bankroet y Gobierno ta pidi asistencia di un prestamo cu Aruba por a ricibi pa sali for di problema for di 2015.”Informantenan experto di DIARIO ta sumamente preocupa pa e situacion cu ta desaroya den Reino.
Miembronan di Parlamento Hulandes ta tras di medidanan pisa di Hulanda y pa intervencion directo di Hulanda na Aruba. Nan no ta mira con Aruba por resolve e debe enorme cu Mike Eman a laga atras ora na 2017 el a perde eleccion.
“Na 2014 ora pueblo a duna Mike Eman un gobierno mayoritario atrobe, Aruba tabata ciego. Hulanda tabata consciente di loke tabata pasa y di e comedia cu Mike Eman a hunga cu welga di hamber pa evita cu Aruba lo a tuma nota di loke el a haci,” a wordo splica na DIARIO.
A referi na e forma cu berdad a wordo scondi pa pueblo hasta na 2015 ora incidentenan importante a tuma luga na Aruba.
“E pais tabata den zona completo di peliger cu awe ta culmina. E parti mas tristo ta cu den seno di Reino no tin confiansa mas cu Aruba por sali for di e situacion actual sin medidanan serio,” a wordo splica.
Mundo politico na Hulanda awor a pone luz riba e debe nacional cu a bira 4 Miljard Florin y cu Aruba mes no por soluciona.
DIARIO tin un par di dia den contacto cu informantenan cu a mustra cu politiconan Hulandes no por sigui sostene un situacion na Aruba cu a wordo crea dor di politiconan Arubano.
“Na 2014 ora Mike Eman a bolbe lucha pa bira e politico cu mas cantidad di voto ya desaster pa Aruba tabata un hecho. Por a scapa Aruba si el a acepta un prestamo suave, cu awe Aruba ta pidi pa soluciona e debe cu segun politiconan Hulandes a pone un Aruba den un situacion si bancarota,” informantenan ta indica.
Pa politiconan Hulandes, e situacion di Aruba ta serio y ainda mester bay tene cuenta cu loke ta resulta di Citgo pa cual tambe nan a adverti sin haya oido di gabinete Mike Eman.
For di 2016 ya Gobierno Hulandes a afirma na Tweede Kamer Hulandes cu ta gobierno Eman ta responsabel pa tur resultado di Citgo y cu Hulanda lo no wordo perhudica.
Awe cu e desastre di Citgo a empeora e crisis financiero, Hulanda ta mira cu gabinete Eman a duna prueba cu Aruba no por soluciona e situacion actual riba su mes.
“Tur yudansa cu Hulanda duna lo ta mara na intervencion Hulandes pa asina garantisa cu ta bini un solucion pa e situacion cu a wordo crea,” a informa na DIARIO, cu ta sigui tur desaroyo den mundo politico Hulandes riba e asunto serio.
FUENTE: Diario de Aruba
