domingo, 19 de febrero de 2012

Crusero a regresa Merca debi na virus cu a afecta 173 persona

ORANJESTAD (AAN): E barco crusero Crown Princess cu a sali diasabra pasa for di Merca cu destino Aruba y Corsow y den dje 3078 pasahero, mester a regresa urgentemente na e puerto di Everglades, Miami. E compania mes a duna ordo na e capitan di e barco pa bay Miami bek despues cu 114 pasahero y 59 miembro di e tripulacion a mustra sintomanan di novovirus, cual ta causante di gastroenteritis.
E crusero a sali diasabra cu destino Aruba y Corsow pa un travesia di un siman, pero diahuebs e mester a bay Miami bek.
Segun un comunicado di prensa, e empresa a lamenta loke a pasa y a señala cu ta algo inusual pero a priminti duna e placa bek na e pasaheronan y haci areglonan di hospedahe den hotelnan y avion pa esnan cu lo mester a bay bek na nan lugar dib residencia, entre otro.

E brote a cuminza den e mesun barco siman pasa, den un viahe previo, ora cu un promedio di 400 pasahero a bira malo como tambe e tripulacion.

Crown Princess a regresa Fort Lauderdale cu 364 pasahero y 30 tripulante, di e total di 3100 persona cu tabata tin abordo .

E barco lo wordo someti na un proceso di des-contaminacion durante dos dia y ta spera cu e por continua cu su viahenan awe diasabra.
Otro 92 pasahero y 13 miembro di e tripulacion di e crusero Ruby Princess, cu a desembarca diadomingo pasa na e costa zuid di Merca tambe a wordo contagia cu novovirus.

E sintomanan di novovirus ta entre otro diarea, sacamento y dolor abdominal. Ta wordo transmiti di persona pa persona atravez di e consumo di alimentonan of awa contamina of pa medio di e contacto cu superficienan infecta cu e virus.

FUENTE: http://www.diario.aw