Informacion hopi digno di credito cu nos tin, ta indica cu e Cubanonan aki ta bira loco na nos pais: nan ta bay un tienda cu ta bende “guayabero” masha barata mes y no ta sali cu un of dos pero cu cinco of seis, y si por, hasta mas. Esaki ta e style di camisa cu Cubanonan ta gusta bisti.
Algun ta bira hopi impresiona y entusiasma cu Aruba y loke nos pais chikito ta ofrece, cu nan no ta mira den nan pais di origen ni na Venezuela.
Tin indicacion cu algun ta personanan profesional den salud (por ehemplo enfermero), y nan a cuminza puntra con e tereno di enfermeria ta na Aruba y sondea ki posibilidad nan lo por tin pa bin traha akinan.
Nan tin passport Venezolano caba, podise nan ta sinti cu e lo no ta asina dificil manera si tabata cu passport Cubano nan ta viaha.
Tambe nos fuente di informacion a comenta cu nan a descubri cu na Aruba tin lugar ta bende ciga “habano” y ta otro producto cu nan ta bira loco cune.
No ta conoci pa nos si ta trata di personanan cu por tin famia na Aruba, ya cu ultimo añanan un grupo chikito di Cubano a establece na Aruba.
En todo caso, mester ta un cambio drastico pa un persona cu a sali di un regimen comunista pa bay biba den otro regimen mescos y pasa den tanto privacion, bin Aruba y wak con bunita nos isla ta, e libertad y democracia den cual nos ta biba aden (cu su virtudnan y puntonan debil manera tur otro pais democratico tin), cu nos tin un area comercial interesante apesar cu nos ta un pais chikito, y cu no tin polis cu cara largo ta keda wak y vigila nan, unda cu nan ta bay. Dios conserva nos dushi libertad y democracia pa semper, cu ta algo cu nos tur cu ta biba akinan mester aprecia y gradici.
| FUENTE: http://www.diario.aw |
