Poco, poco e Venezolanonan a cuminza drenta pa residi den nos pais, y mescos e Colombianonan.
Asina a trece dilanti atravez di yamadanan di opinion publico, unda nan ta reclama cu di e Dominicanonan si ta wordo exigi VISA pa drenta Aruba, por ehemplo esnan cu ta bin haci turismo of ora un residente kier trece un familiar (mayornan, ruman, etc), pa pasa algun dia akinan, mientras cu e Venezolanonan por drenta akinan manera “Pedro por su casa”!
Tambe tin algun Colombiano cu a yama nos cu e mesun tema. Nan no ta haya husto cu esnan Colombiano si mester di VISA pa bin Aruba, pero e Venezolanonan no. Mirando e situacion caotico cu tin na Venezuela ta un hecho cu un cantidad grandi di Venezolano lo kier drenta Aruba pa keda. Hasta tin un persona cu a duna indicacion cu tin un señora Venezolano cu ta bin pa tres siman, y mientras e ta na Aruba ta haci trabao domestico cerca un par di paisano, pa asina autoridad evita problema cu autoridad concerni.
E persona Colombiano no ta critica esey riba su mes. E necesidad ta asina grandi cu e mes, ora a haya sa y mira cu su wowo a keda keto, pa no haci daño un ser humano cu sin duda mester di un entrada y cu ta buske via trabao y no haciendo algo malo.
Pero di e manera aki posiblemente hopi mas hende lo drenta Aruba y semper lo tin ken pa tuma nan den servicio, y busca manera pa e keda na Aruba hasta sin permiso pa traha.
Pesey e ta haya cu e mihor manera pa evita pa e situacion bay for di man, ta exigi VISA pa e Venezolanonan tambe, y aplica e expresion asina bon uza riba nos Isla “Ley pa un ley pa tur…”
| FUENTE: http://www.diario.aw |
