martes, 18 de septiembre de 2018

(Aruba) Booshi Wever sorprendi cu Ministro Glenbert Croes ainda ta lagando e “untouchable” handle asunto di Refineria

Drs. Booshi Wever di Partido UPP a tuma bon nota di loke Ministro Glenbert Croes a trece dilanti. Den e conferencia di prensa cu minister Glembert Croes a tene pa purba di hustifica su “uitzendburo”, a resalta cu de facto el a subraya cu en berdad ta esey ta e caso. El a trata di traha un “smokescreen” rond di Booshi Wever, pero de facto e no a contradeci net nada di loke Partido UPP a trece padilanti.

Nan a denuncia e practicanan di un “Cartel” y el a admiti esey na varios ocacion y a purba di desvia atencion, bisando cu GTS ta parti di e kliek di AVP. Wel si ta asina di con keto bay ainda GTS tin un contracto cu RDA pa e planta di Algae, cu no ta funcionando? Cual Algae tin pensa di cultiva si NO tin CO2 pa catch y procesa? Ta ken e management di RDA ta proteha anto?

Wever a agrega na e pregunta, si acaso GTS tin un “vendors-contract” cu Citgo? Loke si UPP sa cu GTS tin un contract direct cu RDA. Esey kiermeen cu e “untouchable” di RDA tambe ta forma parti di e kliek di AVP? Tambe e minister a declara cu Patrick Farro tabata traha cu GTS, kico UPP mester pensa cu e tambe tabata of ta forma parti di e kliek?

Pa cuanto tempo e minister tabata sa caba cu ta 114 miyon Dollar a worde “scarmay” y no a haci nada pa defende algun contratista local cu nunca a worde paga door di e estafadornan aki? Kende ta esnan cu a scarmay e placa aki? Di con no a percura pa scarmay tambe e culpabelnan?

Di con e minister cu tin contacto directo y estrecho cu e hendenan di e gobierno Chavista, no a haci uso di e esey pa bisa nan pa nan cumpli cu nan deber cu Aruba enbes di lanta bela bay?

No lubida ta e pueblo di Aruba ta para garantia pa tur esaki, conforme e contracto strangulante cu e.o. minister Glenbert Croes ta asina orguyoso di a vota na fabor, hunto cu tur su coleganan.

Hopi hende no ta para keto riba e declaracionnan di minister Glembert Croes. Ta hopi peligroso ora cu un “uitzendburo” di gobierno kier bay dicidi pa un compania priva, ta cu cua compania e mester bay traha cune. Esaki ta un pensamento “Chavista-socialista- Bolivariano” cu mester tene cuidou cune. Cu kier proteha e local (straño cu eno ta usa e palabra Arubiano) nos ta di acuerdo cu esey, pero cu un compania di gobierno (uitzendburo) kier bisa un compania privá ta cu cua compania e mester bay traha ta peligroso. Defacto e “O&G Industry Desk” a bira un uitzendburo di companianan y no trahadornan. Ta deliberadamente a haci esaki?

Manera ya UPP a menciona cu Citgo ta firma solamente cu contratistanan cu ta cumpli cu e rekisitonan estableci. Esaki ta e asina yama “vendors” y ta un paar di contratistanan ta cumpli cu esaki. Cuidao cu no ta esey e minister y su grupo kier logra. Esta haci un show cu ta para pa e local (no pa e Arubiano) y pa cierto contratistanan cu kizas NO ta cumpli cu e rekisitonan necesario, pa despues Citgo busca esun cu e kier.

Segun drs. Wever, ta un show tambe pasobra e minister sa cu den e contrato strangulante cu el a braza masha duro ta poni hopi bon cla cu Citgo y e contratista principal por “hire & fire” na su antoho y Citgo por “hire” e contratista cu e kier. Y paga pa loke e ta haya ta bon.

Pues henter e show aki lo tin como resultado cu e cartel den RDA ta keda hunga su wega, keda “Scarmay” placa cu pueblo ta para garantia pe y e mesun kliek ta keda djo djo, via e “Uitzendburo O&G Industry Desk” cu sosten, apoyo y bendicion di full e gobierno di Aruba.

Minister Presidente a bisa recientemente cu RDA ta perde placa y ta contemplando pa split FMSA for di RDA. Cu ki meta? Pa bende FMSA cu un empresa local? FMSA un patrimonio di pueblo cu ta gana placa, na unda nos pueblo por probecha di dje, awor mester worde bendi pa tapa e hecho cu e “untouchable” y su previlegiadonan a permiti pa a “Scarmay” 114 miyon dolar y “get away” cune tambe? Pa colmo ta pronkia cu 35 miyon Dollar cu CITGO a pone awor aki pa realisa fase di 2 y cu si nos comprende minister Croes bon, cu ta pa caba e.o. trabaonan di fase 1, unda cu a scarmay 114 miyon Dollar.

Mientrastanto cu tipo di “scarmaymento” aki keda worde permiti, y cu no bin cu un plan integral y strategico, e pueblo di San Nicolas ta keda worde perhudica, kedando asina cu e apodo di “the forgotten city”!

E señalnan ya a cuminza sali y ta worde sinti, na unda varios empresanan ta serando nan porta. Pa colmo hasta e banco RBC a dicidi di sera porta, mientras cu nos no a tende nada for di gobierno di esaki, mirando cu mas o menos 40 Arubiano ta perdiendo trabao. Esaki riba su mes parce di no ta importante pa e gobierno, pasobra mayoria di e trahadornan ta di San Nicolas?

Esaki ta implica cu ni San Nicolas, ni su hendenan, ta importante pa e gobierno aki? Nos hendenan di San Nicolas no por bira parti tambe di esnan cu ta Central pa e gobierno aki? Of ta solamente un kliek mag di forma parti di esakinan?

En todo caso, ora cu banconan cuminza sera porta, ta bisto cu di berdad cos ta hopi malo. Esaki no solamente pa San Nicolas, sino pa henter Aruba esaki ta malo. Esaki a bira tempo pa nos tur cuminsa realiza.

FUENTE: Con información de http://www.diario.aw
 

LO + Leído...