lunes, 3 de diciembre de 2018

(Aruba) Gobierno lo legaliza y regula uso di cannabis medicinal

Durante e conferencia cu a wordo organiza den fin di siman tocante e uso medicinal di cannabis y su posibel legalizacion na Aruba, Minister di Enseñanza Rudy Lampe, a revela den un entrevista cu e meta di e conferencia aki tabata pa comunidad por a busca e informacion corecto riba e topico aki.

Tin un debate cu rond mundo ta wordo hiba despues cu hopi pais a kita e prohibicion di uso di cannabis.

Segun Lampe, Aruba no por keda atras pa loke ta e desaroyo aki. “Hopi hende ta sufriendo di diferente malesa y un remedi sumamente efectivo ta e cannabis”, a bisa.

Den su opinion, no por sigui laga pashentnan sufri mientras cu tin un ayudo eynan pa nan.

Pesey como gobierno, a expresa, “nos ta comprometi cu nos programa di gobierno, cu dentro di e periodo di gobernacion aki ta bay legaliza, regula e uso medicinal di cannabis”.


SOLAMENTE USO MEDICINAL

Lampe a enfatiza cu esaki ta bay ta solamente pa uso medicinal di cannabis. El a agrega cu a keda presenta diferente modelo con por haci esaki posibel y e ta kere cu pronto lo cuminza discuti den comunidad e modelo cu Aruba ta bay scoge p’e, unabes cu den Conseho di Minister trata esaki.

E mandatario a agrega cu por ehemplo, na aeropuerto, un hende cu wordo haya cu un azeta cu ta deriva di cannabis ta wordo priva di su producto, hasta deteni, locual no por sosode mas.

E turistanan cu ta bin di Merca cu ta sufri di cancer tambe ta sufriendo cu e situacion aki ora di drenta Aruba siendo cu na 34 estado di Merca, cannabis medicinal a wordo legaliza.

Aruba ta depende di turismo y esaki sigur ta afecta e principal fuente di entrada di e isla.

Rudy Lampe a finaliza bisando cu te asina leu, lo sigui traha pa scoge e modelo mas adecua pa haci e legalizacion y regulacion di cannabis medicinal aki na Aruba un realidad.

 

LO + Leído...