domingo, 10 de marzo de 2019

Aruba den e trampa y poder di petroleo

Despues di un grandioso celebracion di Carnaval 2019, bida mester sigui na Aruba cu ta atrobe den un crisis serio pa motibo di refineria. Riba un termino hopi corto, Aruba lo mester asumi su responsabilidad y dicidi kico e kier haci cu loke a resta di e refineria cu Exxon a habri y a trece bonanza pa Aruba.
Pa comprende loke ta pasa na Aruba awe, mester resumi y analisa historia mundial y su aspectonan mas principal. Entre nan ta figura e momento cu hende a produci candela, a inventa e wiel, a admiti cu mundo ta rondo, a descubri combustibel pa genera vapor y energia y e chip di tecnologia.

Cambionan radical a ser introduci na humanidad cu den buskeda di sobrevivencia a crea comercio local y internacional.

Cara di mundo a wordo cambia ora autonan a subi caretera, barconan por a crusa lama cu mas facilidad y jet a ser presenta na un mundo cu a drenta un spiraal di avance y bonanza na siglo 20, e siglo di cambio total.

Petroleo a causa rikesa rapido y grandi. Petroleo a logra loke ni oro por a crea na mundo cu a conoce e poder y trampa di azeta cu tabata brota for di interior di mundo.

Ta for di seno di mama tera, mundo e extrae loke awe pa Aruba tambe ta un problema grandi. “Oil crisis”, “Oil shocks”: nombernan cu a ser duna na situacionnan cu a presenta na mundo cu tin te awe petroleo como un di su negoshinan mas grandi, mas poderoso den man di gruponan elitario historico of sorprendente.

Petroleo ta bonanza pa esun cu tabata tin e suerte di biba riba un tereno cu azeta den e suela di su propiedad. Petroleo ta bonanza pa paisnan cu por a introduci e ramo industrial y economico di exploracion, explotacion di petroleo, refineria y fabrica di productonan di refineria.

Hende a muda di un pais pa otro pa mehora condicion di bida. Comunidadnan a conoce expansion y cambio grandi. Tradicion a cambia, cultura a cambia, economia a cambia, situacion financiero a cambia hopi bes cu un rapidez cu hende no por controla.

For di añanan 80 mundo ta busca un forma pa deshaci di su adiccion na petroleo. A introduci plantanan di energia nuclear. Na final mas pais a cuminsa bora y introduci camponan di azeta na tera y bou lama.

Refinerianan a cera y a construi otro mas moderno cu mas eficiencia. Trahadonan cu no tin trabou mas den refineria, awe rond mundo ta haya trabou den intentonan pa deshaci di e problemanan serio cu petroleo ta causa manera daño na naturalesa, clima y hende.

Pero mientrastanto mundo a bira adicto na petroleo. E ta bisto na Aruba cu kier placa pa e segundo fase di su proyecto pa habri e refineria atrobe. Un fase den cual ta inspecta cuanto placa mester realmente pa duna bida nobo na un refineria bieu.

E intento di Aruba ta sosode na momento cu petroleo a culmina den e drama di entre otro Venezuela y tanto otro pais caminda placa di petroleo a bira herment pa dictadura.

Den e situacion actual di Aruba, e trampa politico ta visibel. Miedo politico pa no biba cu e “black mail” politico cu e acuerdo Citgo a crea. Hopi hende no ta mira loke a pasa cu Lago, Wyatt y Valero. Nan ta den e soño di Esso cu un economia cu petroleo no por brinda Aruba mas. Esaki na 2016 tabata e arma mas peligroso cu gobierno anterior a uza. Adiccion na petroleo!

Pa sali for di e circulo vicioso, Aruba e siman aki mester reconoce e adiccion mundial na petroleo y e problemanan cu awor mester soluciona pa evita cu salida for di e trampa di refineria ta bira mas dificil.

Na 2016 politica a abusa di e trampa pa ciego pueblo. Awe gobernacion mester pone fin na adiccion pa asina un Aruba cu ta mira realidad y no ta keda den huma por tuma e pasonan necesario pa kibra e poder destructivo di adiccion economico.

FUENTE: Con información de Diario de Aruba
 

LO + Leído...