Den conferencia di prensa di fraccion di MEP, Parlamentario Endy Croes a hiba palabra, y a reacciona riba un declaracion di ex-premier Mike Eman durante un conferencia di prensa reciente di AVP.Parlamentario Croes a expresa cu sr. Eman pa mas cu 55 minuut a sinta papia y bin cu rapportnan y a manipula y gaña pueblo atrobe.
E parlamentario a haya cu ta na su lugar pa fraccion di MEP como politiconan responsable y como parlamentario, representante di e pueblo aki, pa ora cu sr. Eman y otro miembronan di AVP trece cualkier incertidumbre unda cu nan specialidad ta manipula y gaña pueblo, y pone mira na lugar di un apple gel un pear berde, manera den e caso aki cu ta nan deber pa reacciona.
Parlamentario Endy Croes a referi na e tema di Paul Croes unda cu sr. Eman a purba di yora cu ta pa motibo di financiamento di partido politico y el a cuestiona masha light hasta Ministerio Publico “di con esaki si y esey no” ora di scoge ken ta bay persigui y a keda purba di bende pueblo, cu ta un caso di financiamento di partido politico.
Eman a bisa cu nan tin riba agenda di partijraad pa trata netamente e tema di financiamento di partido politico, y lo bay laga los di comerciantenan y ta bay pidi mas contribucion di e propio miembronan di AVP.
Endy Croes a subraya cu esaki ta algo cu MEP ta haci for di momento cu el a wordo funda na 1971 cu e homber chikito ta regala partido MEP 10 of 25 florin. El a subraya cu Mike ta gaña yora cu for di 2017 nan a stop cu ponemento di borchi pasobra ta hopi costoso y nan a bay na bandera.
Parlamentario Croes a expresa cu Mike de Meza tabata tin yen di borchi y Dowers te awor tin borchi para den diferente lugar unda a hiba campaña. Cu esaki e kier a ilustra, segun su palabranan, riba gañamento di sr. Eman.
Ademas el a subraya cu den e veredicto di Huez ningun caminda ta para cu ta pa financiamento di partido politico. Huez a duna un veredicto basa riba soborno, malversacion di fondo, labamento di placa, etc. etc.
El a menciona dos testigo principal den e caso, cu ta amigo di e ex-minister, unda den cas di un di nan a haya un administracion cu e so a paga sr. Paul Croes 80 mil florin.
Asina por mira, segun e parlamentario, cu e ex-minister tabata cobra pa asina e por duna “omgeving”. Mas ainda, el a wordo sentencia pa 214.000 florin cu a wordo laba y a wordo acusa pa mas di mey miyon florin, unda hopi cauteloso, Huez a reduci esaki.
Croes a agrega cu asina por mira tambe ora el a duna omgeving pa importa trahadornan (cu nan famia), pa e mas di dos mil cupo di trabao cu e Arubiano, of e Arubiano nobo cu tin permiso di trabao caba por a haya pero cu a wordo perhudica.
“Pa nos tin esaki cla, e mancha aki ta colga riba AVP y Mike Eman awor kier purba di troce e berdad, pero ta na nos si kico exactamente a pasa y pakico e veredicto aki ta asina pisa y esaki mester ta un les pa, ohala nunca mas, bolbe sosode den futuro cu ningun politico”.
E parlamentario a expresa cu sigur tin mayor cu yiu na cas cu no por haya trabao door di e maneho desastroso unda un minister a traha un cas cu placa cash, a paga credit card, a cumpra joyas, a instala airco cu placa cu el a ricibi na momento di a tuma placa pa haci fabornan di e magnitud aki.
El a cuestiona tambe e palabranan di ex-premier cu el a laga un pais cu un economia creciendo cu 2.2% di su DGP. Pero na mesun momento fraccion di MEP a coba den e datonan estadistico di Banco Central di 2017, na momento cu Mike Eman no tabata tey mas, y ora di mira e crecemento economico cu e ta papia di dje, e resultado final di ex-minister presidente su percepcion ta indica cu na 2015 e cifranan tabata negativo, cu no tabata tin crecemento bao e vision di AVP y di Mike Eman, igual na 2016 cu – 0.1. Y ma 2017 apesar cu e tabata un aña hopi duro tabata tin un crecemento di 1.2% y no 2.3 manera sr. Eman a sinta gaña pueblo mediante cierto periodistanan cu ta haci e trabao pa kibra informacion pa pueblo, den su creencia cu un lider cu a crea e desastre aki ta papiando berdad y ta resulta cu no ta asina.
FUENTE: Con información de Diario de Aruba
