Diamars anochi, esaki a dal e isla duro den su nanishi! Tres atracador coriendo den un Toyota Rav4 a comete golpi duro contra turismo.
Nan a ranca e tas di turista femenino y bay cune banda di Divi Phoenix Resort riba Irausquin Boulevard.
Sinembargo bon mes cu tabatin un automobilista eybanda cu a mira tur cos, y cu su Celular den man a yama Central di Polis y notifica kico a caba di socede.
Awe mester felicita e team di recherché di Noord cu e tremendo trabao cu nan a haci pa practicamente soluciona henter e caso di asalto riba turistanan diamars anochi.
E turistanan asalta tabata dos dama Argentino cu tabata canando cu tur confianza banda di Divi Phoenix. Aki tres asaltante Venezolano a haya bon di bay comete un golpi grandi contra e pilar principal di nos economia. Tur tres a drenta Aruba como turista y tabata kedando ultimo dianan aki na un cas na Hooiberg 47-C apartamento 3.
Aki ta trata di Franklin Danilo Cabrera Borges naci na Punto Fijo, Venezuela 16 di Juni 1982 (29). El a yega Aruba dia 6 di September 2011 y adres cu el a duna tabata Grenadaweg 5. Esun aki a keda deteni sera den e apartamento na Hooiberg caminda mester a pidi presencia di fiscal tambe.
Ora polis a rondona e area el a sera su curpa den e apartamento. Tabata teme cu e lo ta arma. E otro ta Guiseppe Geraro Zarrella Marquez di Caracas, Venezuela y naci 14 di Oktober 1991 (19). Esun aki a yega Aruba 7 di Augustus 2011 y e adres cu el a duna tabata Tafelbergweg 101G. E criminal aki a bay hospital pa notifica e dokter di cas doño di e auto di loke a sosode.
El a logra huy sin cu polis a gare. Na hospital mirando e orario straño cu el a presenta a pone cu autoridad a worde yama y asina a logra pone man riba dje y hibe warda.
E di tres sospechoso ta esun gara mesun anochi den e area entre Kong Hing cu Certified. El a core pero polis a gare. Aki ta trata di Edwin Alexander Estredo naci na Venezuela 5 di April 1979 (32). El a yega Aruba 25 di Januari 2010. Su lugar di keda na Aruba ta Hooiberg 47-C for di 2 di Juni 2009.
Parce cu nan tabata move y coy job rond riba nos isla. Recherche di Noord ta investigando mirando si nan tin mas caso cometi riba nos isla. Straño ta cu e hendenan aki ta yega y facilmente na aeropuerto ta duna nan cierto cantidad di dia sin mira si nan tin suficiente fondo pa keda. Pa colmo awendia e hendenan aki ta haya prolongacion tambe di estadia. Esey ta haci cu legalmente nan por keda mas largo.
Awor nan number a hunga pasobra recherchenan di Noord a traha rapido riba e caso. Practicamente tur e pertenencianan horta a worde haya back. Camara, placa etc ta back den man di polis cu lo entrega esaki na e turistanan. Solamente e tas ainda no por a worde haya. Tur cos ta mustra cu esaki a worde tira afor.
E dokter femenino di nacionalidad Hulandes cu ta doño di e RAV4 A-27646 ta interna debi na un operacion pero mester presenta tambe na recherché pa duna declaracion encuanto su auto den man di e criminalnan. Asina e comunidad por ta trankil cu e autoridad no ta para keto y ta pikiendo tur criminal ultimo temponan aki.
FUENTE: http://www.diario.aw
