E ceremonia oficial aki a tuma luga na e “Department of Foreign Affairs and International Trade” situa na Ottawa na Canada. Un TIEA ta nifica “Tax Information Exchange Agreement” y hunto cu e firmamento aki ta bin un lista di beneficionan, tanto pa ambos Gobierno como tambe pa e negoshinan of e ciudadanonan mes. Aruba ta entre e paisnan mas renombra cu Canada a dicidi di cera dicho acuerdo cu nos, despues cu recientemente a firma tambe cu Bermuda.
E beneficionan di un acuerdo asina ta hopi y ta varia entre un regimen fiscal mucho mas faborabel pa negoshinan di ambos pais, pues tanto companianan Arubiano cu ta haci negoshi na Canada, como tambe pa e companianan Canades cu ta haci negoshi cu Aruba. E tipo di acuerdonan asina ta atrae inversionnan pasobra e ta mustra e confianza di Gobierno Canades den nos pais y den nos sistema fiscal.
E lasonan entre Reino Hulandes y Canada ta data for di hopi aña pasa. Hasta tin miembronan di famia Real Hulandes cu a nace na Canada. Tanto relacion entre Gobiernonan como tambe entre negoshinan ta hopi estrecho. Claro cu Aruba, siendo parti di Reino Hulandes tin un bentaha grandi den e desaroyo aki.
Na Aruba nos tin hopi relacion cu Canada comercialmente, specialmente den sector bancario. Esaki atrobe ta demostra e confianza cu companianan grandi for di Canada tin den nos isla, den nos economia y den nos sistema fiscal.
Minister Michelle Hooyboer-Winklaar den su discurso durante e ceremonia a duna di conoce cu e acuerdo aki sin duda lo beneficia ambos pais.
E ta referi na entre otro e negoshinan “publicly trade” cu ta depende di un tipo di acuerdo asina pa por inverti den nos pais. E mandatario for di Aruba a gradici Gobierno di Canada pa nan interes y confianza den nos economia y ta sigur cu e TIEA aki lo ta un bon instrumento pa sigui desaroya mas intercambio comercial entre e dos paisnan.
FUENTE: http://www.diario.aw
