Despues di e reunion cu Gobierno Colombiano, encabeza pa Presidente Juan Manuel Santos y Presidente di Energia sr. Cardenas, Prome Minister a sinti su mes masha contento. Motibo ta cu Presidente Santos a reconoce e gran importancia di Aruba pa Colombia, apesar cu nos ta un isla chikito.
Prome Minister den declaracion duna for di Colombia a bisa cu existencia di Valero ta masha importante pa Aruba y ta e motibo cu Gobierno no ta laga e decision solamente den man di e companianan, cu hopi biaha ta tuma un decision “frieu” basa riba cifranan.
“No mester mira solamente e cifranan, pero e relacion den su totalidad di Aruba cu Colombia,” e mandatario Arubiano a bisa. Y a sigui menciona, por ehempel, cu e consumidor (stranhero) mas grandi di cuido medico na Colombia ta Aruba. E cantidad di turistanan Colombiano y remesa for di Aruba pa Colombia ta demostra cu tin un economia bastante activo entre e dos paisnan aki.
Cu e componente di energia acerca, lo por pone un dimension adicional. Naturalmente tin e aspecto tambe cu Gobierno di Gabinete Mike Eman cu ta trata di profila Aruba como un gate-way pa Latino America y cual plan a worde presenta tambe na Gobierno di Colombia.
E delegacion di Aruba a haya e impresion cu e presentacion cu a worde duna na Colombia, a crea mas interes cu solamente e aspecto di e refineria. Esey ta e punto cu a cambia henter e escenario den un aspecto positivo, caminda tur a demostra un interes pa busca un solucion pa e refineria di Aruba.
Durante un reunion siman pasa di Prome Minister Eman cu Consul Colombiano Tarquino Pacheco, a bini dilanti cu e transferencia monetario entre Aruba y Colombia, ta papiando aki di remesa y relacionnan comercial, ta core den 1.2 biyon dollar anualmente.
FUENTE: http://www.diario.aw
