Partidonan na mesa a delibera y hunto ta studia e miho solucion pa Aruba

ORANJESTAD(AAN): Mundialmente e crisis riba petroleo ta un punto di preocupacion grandi. No ta pasa un dia cu e noticia di prijs halto y creciente di crudo no ta den luz di atencion. Na Aruba e situacion aki ta afectando nos tambe, sigur pa e isla chikito y vulnerabel cu nos ta. Valero Aruba ya algun luna atras a anuncia di lo cera su portanan meramente pa e prijs di crudo cu ta asina halto cu ta pone cu su operacionnan ya no ta rendabel. Un situacion ilustrativo di loke ta pasando mundialmente.
Gobierno di Aruba y sigur Prome Minister Mike Eman ta moviendo cielo y tera pa bin cu e miho solucion pa e isla aki. Di esaki no cabe duda. For di momento cu Valero a mustra cu si no bin cambio, sea pa haya un miho prijs di e crudo of pa cera un partnership, cu lo cera e refineria, Gobierno a cuminsa sondea y explora delaster un posibilidad y scenario cu a bin dilanti.

Prome Minister Eman hunto cu Minister de Meza a biaha pa exterior en busca di e solucion pa tene e refineria habri. Mescos tambe a manda delegacionnan di comercio y di Parlamento pa Venezuela y Colombia pa mira kico por haci na e situacion na Aruba. Durante su ultimo biahe pa Colombia na unda Eman y de Meza a papia cu Presidente Santos a combini cu ta tene un cumbre riba petroleo y gas na Aruba cu presencia di ehecutivonan halto.

E cumbre di importancia grandi aki a tuma diabierna ultimo dia 24 di februari 2012. Esaki riba su mes caba ta un logro grandi. Un cumbre di un indole asina den un tempo cortico pa hunto trata na yega na e miho solucion pa Aruba y e comunidad aki ta algo di aplaudi. E ta muestra di e esfuersonan grandi cu ta worde haci.

Presente na e cumbre aki tabatin banda di Prome Minister Eman y Minister de Meza representantenan di Valero, Ecopetrol, Repsol, GasUnie y Anthony Veder. Tambe tabatin varios consehero local y tambe for di exterior presente, entre nan Laurens Jan Brinkhorst, ex Presidente di Islas Canarias Fernando Fernandez Martin, consul di Reino Hulandes na Medellin sr. Restrepo y tambe Javier Hernandez di Corsou kende pa varios aña a dirigi e refineria na Corsou.

El a duna un presentacion bon y al caso cu a capta atencion total. Despues di e presentacionnan cu tabata dirigi riba aliansanan cu kier logra riba LNG y NG (Gas Natural Likido y Gas Natural), riba exploracion di gas y petroleo pafo di e costanan di Aruba y un aliansa entre Gobierno di Aruba, Valero y Ecopetrol tocante e refineria di Aruba y e “project upgrader” pa procesa crudo pisa di Sur America, a sigui un lunch na unda e delegadonan a papia den un ambiente mas relaha cu otro.

Den oranan di atardi a forma gruponan pa delibera y discuti con por yega na cera e aliansanan aki. Na final a yega na un acuerdo cu a worde acorda cu partidonan envolvi den cua nan ta bisa di lo studia ampliamente e posibilidadnan pa cooperacion y riba aliansanan cu a worde discuti durante e cumbre. Esaki ta sosode den cooperacion cu Gobierno di Aruba y den un periodo cortico.

E dia siguiente ehecutivonan di Ecopetrol a bishita refineria Valero na unda nan a haya un bon guia y informacion adicional. Nan a pidi algun documento di e refineria y Valero a priminti di lo cumpli cu e peticion aki mas pronto posibel. Sin duda e cumbre aki a duna su frutonan den sentido cu a sinta hunto na mesa, a delibera tur opcion cu tin y a yega na un declaracion conhunto. Mientrastanto por bisa cu Gobierno no ta para keto y ta sigui sondea otro posibilidadnan cu por presenta.

FUENTE: http://www.diario.aw