E expresion aki a worde ricibi cu un aplauso masha grandi. Prome Minister a expresa palabranan di gratitud na tur esnan cu hunto cu gobierno ta trahando duro riba e proyecto aki.
“Ora nos ta bin hospital sea como pashent of como bishitante, nos ta observa e procesonan aki den. Pero ta te ora bo mes ta e pashent of un ser keri di bo pa un periodo mas largo, cu bo ta realisa y aprecia e trabao duro cu ta worde haci aki den”, asina Eman a bisa. Aki el a referi na e periodo di casi dos luna cu e y su famia a pasa aden ora cu nan mama a worde cuida den hospital. “Aki mi a mira di cerca e dedicacion di esnan cu ta traha aki den. Algo cu hopi hende no ta realisa ta cu contrario na otro negoshi of compania, un hospital ta draai 24/7. Un organizacion increibel y un dedicacion admirabel”.
Eman ta bisa cu ta pesey cu ora e proyecto di renobacion y construccion nobo dr. HOH a bin dilanti, mesora e idea aki a worde brasa p’e y su Gabinete, pasobra cu e ta un necesidad pa e pashent y pa esnan cu ta traha cu y pa e pashent. Pa tur esnan cu ta haci e diferencia pa e pashent, pa Aruba y e comunidad aki, e construccion y renobacion di HOH ta necesario.
“Aruba a conoce un desaroyo economico rapido. Nos a construi hotelnan bunita cu ta esencial pa e desaroyo economico. Hopi di e placa cu ta bay worde inverti den e hospital aki ta bin di e desaroyo menciona. Sinembargo, e desaroyo economico aki no semper a worde traduci den e bienestar general di e comunidad aki di e manera cu nos kier a wak’e. Mi no ta cansa di bisa cu mescos cu nos kier tin hotel di 5 strea, nos kier tin schoolnan di 5 strea, barionan di 5 strea, casnan di anciano di 5 strea y sigur un hospital di 5 strea. Awe nos tur aki ta testigo con hunto nos ta trahando pa bin cu e hospital di 5 strea”, Eman a bisa. Prome Minister a splica con pais Aruba ta bay financia un proyecto di e magnitud aki. Esaki ta bay den concordancia cu SOGA (Stichting Onroerend Goed Aruba) cu ta e fundacion cu ta busca e fianza pa construi e hospital cu ta worde ‘geleased’ door di gobierno for di SOGA pa un suma cu ainda mester worde determina ora e proyecto keda cla. Un suma grandi cu ta worde paga door di gobierno cu ta pon’e gratuitamente na disposicion di dr. HOH pa maneh’e. Eman “Nos ta hopi consciente di e responsabilidad financiero. Pero ta asina si cu di e forma aki e ta cumbini tur hende, pasobra cu no mester paga un suma grandi di un solo bes, pero e ta worde distribui riba hopi aña”.
Director di hospital Falconi a haci entrega di un buki na Prome Minister Eman cu e proyecto y e fasenan con e renobacion y construccion di dr. HOH ta bay tuma luga y con finalmente e ta bay keda. E demas invitadonan tambe a haya un buki igual. Prome Minister y dr. Falconi a gradici esnan cu ta continuamente y intensamente bezig cu e proyecto grandi aki, srs. William Phillips, Ruben Croes, Junior Tromp y Jossy Figaroa.
FUENTE: http://www.diario.aw
