Un hoben cu a aplica pa cuminsa e aña escolar entrante september na un universidad local a haci tur loke tabata exigi pa haya e divisanan di Cadivi en preparacion pa un aña na Aruba.
El a bin Aruba algun luna pasa pa regla tur cos cu e universidad pa e por habri un cuenta bancario aki y pa e scol por pidi DIMAS pa su permiso di estadia manera cu nan a haci pa otro studiantenan den pasado.
Un famia cu ta biba na Aruba a ofrece p’e keda na su cas y e hoben a cumpra su pasashi pa e por bin na fin di augustus.
Pa su sorpresa, awe e hoben ta haya un carta di gobierno di Venezuela cu e “no ta reuni tur e exigencianan di Cadivi” y p’esey e no ta bin na remarca pa haya e divisanan cu el a pidi. E hoben a haci tur cos cu tabata exigi di dje tempo cu el a somete su aplicacion. E universidad a haci tur loke nan ta custumbra di haci. E hoben aki ya tin su diploma di un universidad di Venezuela pero awor e kier perfecciona su ingles pa e por bay busca su M.Sc. na Merca of na Canada. Gobierno den su carta no ta specifica e exigencianan cu e no ta reuni, y tampoco ta bis’e kico e falta pa haci. Kico por a pasa?
Tempo cu Venezuela tabatin problema diplomatico cu Panama recientemente, gobierno di Maduro a anuncia cu e hobennan venezolano cu kier bay studia na Panama lo no bin na remarca pa “Cadivi dollars”. No a sali ningun anuncio tocante studiantenan cu kier bin Aruba, pero nan ta aplica e mes tipo di prohibicion.
Pa razonnan cu nan so conoce, e gobierno di Venezuela ta exclui Aruba como pais caminda venezolanonan por studia cu ‘Cadivi dollars’. Esaki ta un casualidad of e ta un forma di represaya? clydeharms@yahoo.com
| FUENTE: http://www.diario.aw |
